Ka sorkar kan leh tyngeh ia ki karkhana ba pynkhein kyndon ka MPCB

U Myntri Sorkar uba dei ruh u MLA Jirang constituency u Bah Sosthenes Sohtun la ban jur ba ka jingshah kynthup ka Byrnihat kum ka shnong ba jaboh tam ka lyer kam dei tang ki karkhana kiba don hapoh Meghalaya hynrei ka daw ka dei ruh namar ki don ruh ki karkhana ha Assam.

Haba kren sha ki lad pathai khubor u Bah Sosthenes ula ong, ba ka Byrnihat kam dei tang ha Meghalaya hynrei ka don ruh sha ka thaiñ ka Jylla Assam namar ka don ha khappud.

“Namar kata ym lah ban kynnoh ba ka Byrnihat ka jaboh tang namar ki karkhana kiba don ha Meghalaya. Ka daw ka dei hi namar ba bun palat ki karkhana ha ka liang jong ka Meghalaya bad kumjuh ruh jong ka Assam kiba pynmih lyer jaboh ba ka Byrnihat ka shah kynthup kum ka shnong ba jaboh tam ka lyer” la ong u Bah Sosthenes.

U Bah Sosthenes na ka liang ka Sorkar Jylla ka shim khia haba ia dei bad ka jingjaboh ka lyer ha Byrnihat.

U la ïathuh ba ka Sorkar Meghalaya ka la ïakren bad ka Central Pollution Control Board bad ka Assam Pollution Control Board ban shim da ki sienjam ba tyngeh pyrshah ïa kino kino ki karkhana kiba pynkheiñ ia ki kyndon kiba pynlong ia ka lyer ban jaboh hapoh ka thaiñ.

“Na ka liang ka Meghalaya Pollution Control Board (MPCB) ruh ka la leh katba lah ban iada na Kynjohka jingjaboh ka lyer ha Byrnihat hynrei ym lah ban len ba ki don beit ki karkhana kiba pyrshang ban iaid lait iaki kyndon” u la ong.