Hadien da ki phew snem ba la jah noh ka jingpyndonkam ia ki kulai ha ka kit ka bah, ka leit ka wan na ka jingmih ki kali, ki surok, ki paidbah khamtam kito kiba dang kham khynnah ki bym pat ju iohi ia ka jingpynmareh kulai, ki la ioh ban sakhi biang ia kane ka jingpynmareh kulai kaba long ha madan lynter ha shnong Mawsadang ka Hima Nongspung ba jngai 4 km na shnong Tyrsad, East Khasi Hills.
Ka shnong Mawsadang ka la pyllong ia kane jingiakop pynmareh kulai ka long shi bynta ban pynkhie im ia kaba ju leh mynshwa bad kawei pat ka long ban pynmih pisa na ka bynta ban kyrshan ia ka skul jong ka shnong.
Ha ka jingiakop pynmareh kulai, ia ka nam ba nyngkong la jop u kulai Koh Thup ba la niah da u bah Pientinglang Lyngdoh Marshillong na New Mawjai, West Khasi Hills katba uba wan baar u kulai ba khot kyrteng u Lieh ba la niah da u khynnah 15 snem u Banjoplang Wanniang na Byrki kaba don ha thain Nongkhnum, West Khasi Hills.
Ha kane ka sngi, ki don 8 ngut kaba mut 8 tylli ki kulai kiba wan iashim bynta ha kane ka jingiakop pynmareh.
U Sordar ka Mawsadang u bah Biamdor Nongbet, ula ong ba kane ka jingpynmareh kulai ha kane ka shnong, ka long ban pynkhie im biang ia ki por ba ladep.
U la iathuh ba ha ki snem bym pat don surok, la ju pyllong man u snem hynrei naduh ba don ka surok la pynkut noh ia ka jingpynmareh kulai ha u snem 1988. Hynrei haba iohi ia ki matti ba kine ki kulai kiba iarap ha ka kit ka bah, ka shnong sa shisien ka la pyllong ia kane ka jingiakop mareh kulai.
U Sordar ula ong ba ka Dorbar shnong ka don ka jingthmu ban nang pynheh shuh shuh ia kane ka jingpynmareh kulai, khnang ban long ka jingpynmih pisa ia ka skul Mawsadang Secondary School ban kyrshan tulop ia ki nonghikai.
La khmih lynti ba ki paidbah ka jylla, ha ki snem ban wan kin sa wan ban sakhi ia kane ka jingmareh kulai.
