Ba jur ki jingjia aksiden, shimkhia ka tnad pulit ban hikai ia ki nongñiah kali

Kum ka jingbteng ban pynsngewthuh ia ki nongñiah kali ban kiar na ka jingniah khlem akor bad ban bud thik ia ki kyndon jong ka Motor Vehicle Act, mynta ka sngi sa shisien pat ki bor pulit ka Ri Bhoi District ki la mih ban pynlong da ka programme ai jinghikai ia ki nongñiah kali khamtam ki kali heh ha shilliang u surok bah NH-06 ha ka thaiñ Mawdiangum, Nongpoh.

Kane ka sienjam jong ki pulit ka Ri Bhoi District ia kaba la khlieh da u Superintendent of Police u VS Rathore, ka la nang iai bteng ban peitngor bad ban hikai ia ki nongñiah kali ban burom lem ia kiwei ki nongñiah kali ha ki surok bah National Highway ban iada na ki jingjia accident bad ki jingjia ba sngewsih. Kum ban kdew, ba tang ha kine ki khyndiat bnai, palat 25 ngut ki mynsiem briew ki la duh ei ha ki jingjia accident kiba shyrkhei kiba la jia ha u surok bah National Highway 06, u surok Shillong Bypass bad kiwei kiwei ki bynta ha Ri Bhoi District.

Ha kane ka jingmih ki pulit, na Nongpoh Traffic Branch la lamkhmat da u Sub Inspector Bah B. Thangkhiew, ban ai jingbatai ia ka rukom iaid liang ba dei ban iaid beit ha ka liang ka diang ha u surok bah (Lane Driving), ka jingdonkam ban kiar na ka jingpynher sted ia ki kali (Speed Limit) bad kiwei kiwei katkum ka kyndon jong ka MVA, ha kaba la kyrpad ruh ia baroh ki nongñiah ba kim dei ban niah ia ki kali hapdeng ka jingshoh u khawiang, ka jingpyndonkam ia u seat belt.