Ba kiew syndet ka bai bording, iakynduh ki paidbah Umtasor ia u AEE, MePDCL

Da ka jingbitar halor ka jingkiew palat pud ka bai pyndonkam bording ilektrik, myntan ka sngi ki nongshong shnong ka Umtasor Mawdkhar, ki la leit ban tur sha ka ophis u Assistant Executive Engineer jong ka Nongpoh Rural Distribution Sub Division ka MePDCL ha Nongpoh na ka bynta ban pan jingshai halor ka jingkiew syndet ka bai bording ha katei ka shnong. Kumba la iathuh, la don kumba 30 tylli ki longiing kiba la shah ktah kynsan ha kane ka jingkiew ka bai pyndonkam bording ilektrik ha ka shnong Umtasor Mawdkhar, kaba la ktah shi katdei ia ki longiing kiba duna ka ioh ka kot.

Na ka liang ka Kong Felita Muruh bad u Bah Victor Dkhar, kiba dei kiba la shah ktah ha ka jingkiew syndet ka bai bording ilektrik, ki la pynpaw ba kum ki nongshong shnong ki dap da ka jingkyndit bad ka jingsngewkhia kaba jur halor ka jingkiew jong ka bai bording ilektrik kaba la kiew shaba palat pud. Ki la iathuh ruh, ba ka tnad sam bording ka la pynpoi ia ka bai bording kaba la kot sha ka 16 ne 17 hajar jong ka shibnai kaba la pynlyngngoh ia ki bad ki dap da ka jingsngewkhia ba naei kin lah ban siew ia kat katei ka bai bording namar ki dei kiba hap ban bsa ia ki khun ki kti bad wat ban siew ia ki bai skul bad kiwei kiwei kiba ka sorkar jylla ka dei ban pyrkhat lem ia kum kine ki longiing.

Ki la pynpaw ruh, ba na ka liang ka tnat sam bording kim pynpoi tikna ha ka por kaba biang ia ka bai pyndonkam bording ilektrik bad kane ka buh jingeh shikatdei ia kiba bun tylli ki longiing khamtam kito kiba duna ka ioh ka kot ban siew ia ka bai bording kaba heh. Ki la pynpaw ruh ba shen kin sa leit kynduh ruh ia ki bor kiba kham halor ban rah ia kane ka jingeh jong ki.