Bthah u MR ia ka SAI Computer bad MePDCL ban pynpoi thikna sha ki longiing ia ka bording ilektrik

U Myntri Rangbah ka Jylla u Conrad K Sangma hynne ka sngi ula lum ia ka jingialang ha State Guest House, Taraghar, Shillong ban bishar ia ki kam ba ia dei bad ka jingsam bording elektrik, ka rukom ai ia ka Bill bad ka jingud jingnam jong ki nongthang bording elektrik ha ki jaka ba la pyniaid da ka SAI Computers hapoh ka jingpynbeit Distribution Franchisee jong ka Meghalata Power Distribution Corporation Limited (MePDCL).

Ha kane ka jingialang la iashim bynta da u Chairman-cum-Managing Director, MeECL, Sanjay Goway, ki Heh Ophisar ka MePDCL, ki nongmihkhmat ka SAI Computers bad kiwei ki Ophisar ba don bynta ha ka kam.

Ha ka jingialang, ka SAI Computers ka la ai ia ka jingbatai kaba bniah halor ka jinglong jingman jong ki kam ba ka pyniaid ha ki jaka ba ai wai sha ka (franchise area), haba pynpaw ia ki jingeh kiba la ioh pateng na ki rukom pyniaid ba ha shuwa, kynthup ka jingbun ki meter kiba thut treikam, ki jingtei kiba la rim, ka jingsniew ki Transformer, ki jingtan bording khlem meter, ka jingduna ha ka jingkheiñ ia ki nongthang bording bad ki kam ba ia dei bad ka jingai bill.

Ki Ophisar ki la pynpaw ba bun bah na ki nongthang bording ha ki jaka ba aiwai (franchise area) kiba dei ha ka kyrdan Below Poverty Line (BPL) bad bun ki meter ha ki jaka ba dang aiti thymmai ki dei ki bym treikam shuh ha ka por ba shimti ban pyniaid ia ka kam. Ki la pynpaw ruh ba ki jingpyrshang ki la iaid shaid shaid ban bujli ia ki meter kiba la sniew, ban pynbha ia ki jingtei ba ia dei bad ban weng ia ki jingeh kiba la slem bha kiba kwah ia ka jingsam bording.

Haba pynpaw ia ka jingsngewkhia halor ki jingujor u paidbah ba ia dei bad ka bill boring elektrik kaba heh bad ka jingbym thikna ka jingioh bording, u Myntri Rangbah ula ban jur ba ka jingshaniah ki nongthang bording bad ka jingai jingshakri ka dei ban long kaba kongsan tam.

“Ka bording electrik ka dei kawei na ki jingshakri paidbah kaba hap ban khmih bha namar ka ktah ia ki longiing man la u bnai. Lada ki paidbah ki siew ia ka bai bording kaba heh bad kim ioh ia ka bording ba lah ban shaniah, kan don beit ka jingbym sngewtynnad. Ngi hap ban sngewthuh ia ka jingsngewkhia jong u paidbah bad ban leh eiei mardor” la ong u Myntri Rangbah bad ula pynpaw katba ka Franchisee ka lah ban ioh pateng ia kiba bun ki jingeh na ki rukom pyntreikam, ki nongthang bording ki dei ban long kiba hakhmat eh haba khmih ia ka rukom ai jingshakri kaba ki ioh.

Ula bthah ia ka SAI Computer bad ka MePDCL ban shim ia ka lynti kaba kham phaikhmat sha ki nongthang bording ba pyntreikam ia kino kino ki jingpynkylla.

“Ki paidbah kim tip satia mano ba ioh pateng ia ki jingeh. Ki kwah ia ka jingshakri kaba bha. Namar kata, ka jingpynleit jingmut ka dei ban long nyngkong eh ha ka ban pynbha ia ka jingsam bording, bujli ia ki transformer bad meter, bad pynkhlain ia ki jingtei. Shisien ba ki paidbah kila sdang ban iohi ia ka jingjanai, ka jingshaniah kan sa wan” bad ka ong “Ki briew jong ngi kiba shisur shidur. Lada phi kren ia ki da ka akor ka burom, kin jubab ia phi da kaba bha. Lada ka don ka jingbym iasngewthuh, ka jingbym ia sngewthuh jingmut kan nang heh. Ban tei ia ka jingshaniah bad ki nongthang bording ka dei kaba kongsan bha ha kane ka khyllipmat” ula ong.

U Myntri Rangbah ula bthah ia ka Franchisee ban leit pynlong ia ki prokram pynsngewthuh paidbah sha kylleng ki jaka bad pyniadon bynta lang ia ki nongialam jong ki thain, ki Nongmihkhmat Balang, ki Sengbhalang, ki Nonghikai bad ki kynhun bapher bapher ba kin batai ia ki jingeh bala pynbeit, ka jingpynbha ba la shim bad ka por bala buh ban pyntreikam. Ula ai jingmut ruh ia ka kompani ban pan ia ka jingai jingmut na ki paidbah bad ban leh eiei ia ki jingeh jong ki hapoh ka por kaba biang.