Bun ki karkhana ba pynkheiñ ain ki la khang Dang bishar bniah ka sorkar ia ka jingjaboh ka lyer ha Byrnihat

U Myntri ka tnat ka Koit ka Khiah u Bah Wailadmiki Shylla, u la ong ba ka Sorkar jylla kan ym shim kyrkieh ïa kano kano ka sienjam halor ka ishu ba don kiba kem pang namar ka  jingjaboh ka lyer ha Byrnihat tang namar ki khubor ha social media. Haba kren sha ki lad pathai khubor u Bah Wailad ula ong ba ka Sorkar Jylla kan hap ban shong bishar bniah bad hap ban wad ia ki pynshisha, ki sakhi sabut ha shuwa ban shim ia ki rai ban phah tohkit, la don ne em kiba ioh pang namar ka lyer. U Bah Wailad la ong ba haduh mynta ym pat don kano kano ka jingujor ba ka Sorkar ka la ioh pdiang na ki Dorbar Shnong ne naki nong shong shnong.

“Ha kane ka juk teknoloji, mano mano ruh ki lah ban pynmih khubor hynrei kum ka sorkar ngim lah ban shu shim rai tang halor kaei kaba paw ha social media,” u la ong. U Myntri u la ong ba ka sorkar kam kyntait ba Byrnihat ka la ju don ha ka thup jong ki jaka kiba jaboh tam ha ka liang ka lyer, hynrei bun ki sienjam ki la dep ban shim. U la kdew ba bun ki karkhana kiba la pynkheiñ ïa ki kyndon jingïada mariang la dep ban khang bad ki sienjam ba la shim da ka Meghalaya State Pollution Control Board ki la pynlong ïa ka Board ban ïoh ruh ïa ka khusnam.

“Hynrei kata kam mut ba ngim peit shuh ïa ka jingjaboh. Ngi dang lum ïa baroh ki jingtip bad hadien kata yn shim ïa ki sienjam kiba donkam,” u la ong. U la ban jur ruh ba ka sorkar ka hap ban pyrkhat ruh ïa ka jingïoh kamai jong ki paidbah kiba shong shnong ha katei ka thaiñ shuwa ban shim rai.