Dawa ka BJP ban tohkit halor ka jingtwa surok Shillong-Pynursla-Dawki

Ka BJP Meghalaya ka la dawa ba ka sorkar jylla ka dei ban thung da ka jingtohkit ban wad bniah ia ka daw halor ka jingtwa ka surokbah 260 Shillong-Pynursla-Dawki.

U Nongaiktien ka BJP Meghalaya u bah Mariahom Kharkhrang haba kren sha ki lad pathai khubor ula ong ba ka jingjia ka jingtwa khah khah ha kane ka surokbah kam dei kaba shu jia kyntoit hangno re hangno hynrei ka la ju jia man ka por.

“Nga kyrmen ba ka sorkar kan thung ia ka jingtohkit halor kaei ka daw ka jingjia khah khah ka jingtwa ka surokbah-260 Shillong-Pynursla-Dawki bad ban tohkit la ka kompeni kaba pyntrei ka don ka jingtip ban trei ia kane ka kam namar ban trei ha ki jaka ba long lum ba don ki riat ka iapher bad ka jingpyntrei surok kum ha ki jaka ba madan,” ula ong.

U bah Kharkhrang ula pynpaw ia ka jingsngew khia ia ka jingjia man ka por bad ula dawa ba ka la donkam ia ka jingtohkit ban tip bniah halor kane ka jingjia kaba man ka por bad hadien ba la lap ia ki daw, dei ban shim ia ki sienjam ban iada na kano kano ka jingjia.

“ Kane kam dei ka sien ba nyngkong ba twa ka surok hynrei ka la jia teng mynshwa ruh ha kaba ki briew kila duh ei ia la ka mynsiem. Namarkata nga kyrmen ba ka sorkar kan thung jingtohkit ban wad ia ka daw,” ula bynrap.

Ula ong ba ka jinglong shngain ki paidbah nongleit nongwan, ka dei ka bynta ba kongsan tam jong ka sorkar bad ki bor ba dei peit.

Ha kajuh ka por, ula ong ban pyntrei ia ki surok ha jylla kan kham lah lada ki kontraktor trai ri ki lah ban shim ban pyntrei ia ka kam bad lehse lada lah ban phiah ia ka jingpyntrei ia ka kam kan kham biang ban ia kaba ai pyntreilut sha ki kompeni shabar.Kane ka jingkynthoh ka BJP ka dei hadien ba ka surok hajan Lad Umthli, harum Laitlyngkot ka la dkut tbuk hynnin ka sngi u Blei haduh ba ka la khang lad sbak ia ka leit ka wan sha ka thain Pynursla, Dawki.