Donkam ka jingiatreilang na baroh ki kynhun ban pynduh jait ia u drok, ongu Conrad

Ka Jylla Meghalaya ka la rakhe ia ka sngi pyrshah dih drok bad ka jingkhaii beain (International Day Against Drugs Abuse & Illicit Trafficking) hynne ka sngi ha nongbah Shillong ha kaba la shim bynta da u Myntri Rangbah ka Jylla u Conrad K Sangma, u Myntri kam Jngohkai u Timothy D Shira bad kiwei kiwei.

Haba kren ha ka jingialang, u Conrad K Sangma ula pynpaw ka jingsngewnguh ia baroh ki kynhun ba don bynta ban iakhun pyrshah ia ka jingdih bad jingkhaii drok bad kane ka sngi ka long ban pynkynmaw ban iatylli kawei hapdeng ka Sorkar bad ki Shnong, ki Nonghikai, ki Balang halor ka thong ban rat dyngkhong ia ka jingdih bad jingkhaii drok bad pynduh ia ka jingibein ia ki nongdih da ka jingsngewlem.

Ula bynrap ka DREAM ka la sdang kum ka thong ban pynduh jait ia u drok da ki jingiakhih ha ki bynta bapher jong ka imlang sahlang ha ka jingiakhun pyrshah ia ka jingdih drok da ka jingiatreilang na baroh ki kynhun naduh ki riew shimet bad ki seng bapher bapher.

“Ngi don ki shkor ban sngap ia ki jingai jingmut jong phi. Ka long kaba kongsan ban ia don bynta ym tang ia ki kynhun bapher hynrei ki riew paidbah ruh ha ka jingiakhun pyrshah ia u drok. Lada kane kam pat urlong kan ym don jingktah katkum ba ngi angnud kumta ngi hap ban pyniadei bad ki riew paidbah” ong u Conrad.

U Myntri Rangbah ula plie ruh ia ka Centre of Evolution ha Reid Provincial Chest Hospital kaban iarap ia ki riew shimet ba dih droks lyngba ka jingkyrshan ha ka jingai jingsumar, jingiasyllok bad kiwei kiwei.

Ha kane ka sngi la ai ruh ia ka song pisa sha ka Achik Welfare Society, Tura, The Bridge Society, Nongstoin, Khasi Presbyterian Assembly (Selda), Jowai, Dream Solace-Centre For Hope & Recovery, Shillong halor ki kam ba ki trei ban pynshai ia ki paidbah pyrshah ia u drok, kum ka jingkyrshan bad sumar ia ki nongdih drok bad ban ai jingiarap ba kin kylla ka jingim.

Kumjuh ai syrnot ruh sha ki Recovery Champions, Community Champions bad ka Outreach & Impact Award bad la iasoi ruh ia ka Memorandum of Understanding hapdeng ka Tnad Social Welfare, DREAM bad ka SEWA Inland, Tura.