Iasnohkti lang ka Vi bad ka Spotify ban ai ia ka Premium plan sha ki nongpyndonkam ba lah siew lypa ne ki postpaid user

Ka Vi ka la pynbna ia ka jingiatreilang bad ka rynsan pynmih jingrwai, ka Spotify ban tyrwa ia ka Spotify Premium sha ki nongpyndonkam jong ka kiba siew lypa ne ki postpaid subscribers, kaba nang pynkhlain ia ka thup jong ka jingpynmih ia ki jingpynbyrngia lyngba ka digital.  Hapoh kane ka jingiatreilang, ki nongpyndonkam jong ka Vi kiba siew ia ki postpaid plan la ka long kaba pyndonkam shimet ne shiiing kin ioh ban pyndonkam ia ka Spotify Premium haduh lai bnai kynthih bad kim donkam ban siew pisa shuh nalor kaba ki shim ia ka plan ban sngap ia ka. Kane ka jingtyrwa ka ai ia ki nongpyndonkam ia ka lad ba kin tem ia ki jingrwai khlem jingpynthut, ban download, ban lah ban pyniaid bad tem ia ki jingrwai katkum ka jingdonkam jong ki nongsngap ha man la ki kor ba sngap bad ban ioh ruh ka jingsawa jingrwai kaba biang bha haduh 320 kbps. Ki nongpyndonkam kiba la ju pyndonkam ia ka Spotify ki lah ban pyndonkam ia kane ka jingiohnong lyngba ka Vi App.

Ka Vi ka la ong ba kine ki jingthied ia ki plan kiba kan ai, lah ban ioh na ki postpaid plan kiba shongdor 451 tyngka, 551 tyngka, 751 tyngka bad 1,201 (REDX) tyngka, lem bad ki jait family postpaid plan ba la jied da ka Vi, ha kaba kane ka jingiohnong yn ai sha kito kiba dei ki nongsiew. Hadien ka lai bnai, ki nongpyndonkam ki lah ban jied ban bteng ia ka Spotify Premium lyngba ka “Add to Bill” jong ka Vi ka ban long ha ka dor 139 tyngka shi bnai.

U Chief Marketing Officer jong ka Vi, u Avneesh Khosla u la ong ba kane ka jingiatreilang ka pyni ia jingpynleit jingmut jong ka kompani ban nang pynbha ia ka jingiashem jong ki nongpyndonkam lyngba ka jingtyrwa jong ka jingpynbyrngia kaba biang bha. U Managing Director jong ka Spotify India, u Amarjit Batra u la ong ba kane ka jingiatreilang ka thmu ban pynlong ia la Spotify Premium kaba suk ban ioh bad ha ka juh ka por ban ai jingkyrshan ia ki nongshna jingrwai, ki nongpynmih ia ki jingpynbyrngia bad kiwei kiwei ki dur khih ne ki creators bad ka karkhana ka put ka tem baroh kawei.