Khot aplikashon ka  HCLFoundation na bynta ka sien pynlong ba 12 ne ka Edition XII jong ka HCLTech Grant

Shillong: Ka HCLFoundation, ka ba ju pynlong ia ki sienjam treikam ban kit lem ia ka imlang sahlang jong ka kompani HCLTech in India, ka la pynbna paidbah ia ka sien pynlong kaba 12 jong ka  HCLTech Grant ban ai ia ka rynsan sha ki seng trei mon sngewbha ha India ban wanrah ia ki rukom pyntreikam ba iaineh, ki jingkylla ban lam khmat da ki shnong ki thaw ha kylleng ki jaka nongkyndong ka India.  Yn ai ₹24 klur sha ki NGO, ba la jied da ki kynhun bishar, na ka bynta ki projek ki ban wanrah ia ka jingkylla ha ki rukom pynneh pynsah sha ki jaka ba kyndong jong ka India ha ka liang ka um, ka mariang, ka koit ka khiah, bad ka pule ka puthi. Saw tylli ki NGO ki ban jop na kawei kawei ka thup kin ioh ₹5 klur marwei, katba phra tylli kiwei pat ki NGO kin ioh ₹50 lak marwei na ka bynta ka projek ka jong ki. Ka sngi ba khatduh ban pynpoi ia kine ki aplikashon lyngba ka www.hclfoundation.org/hcltech-grant  kan dei 30 Tarik Jylliew 2026.

“Ha ka HCLFoundation, ngi ngeit ba ka jingkylla hi kaba khraw ka mih seng kiba rit kiba ia dei bha bad ka imlang ka sahlang ha kaba ki treikam. Lyngba kane ka sien pynlong jong ka HCLTech Grant, ngi thmu ban wanrah ia ka rynsan ha kaba kine ki  NGO kin lah ban pyni ia ka jinglah ka jong ki, ban sei ia ki rukom treikam kiba thymmai, bad ban wanrah ki jingkylla kiba iaineh ki ban lah ban nang pynbha ia ki jingim bad pynkhlain ia ki imlang sahlang ha kylleng ka ri. Ngi khmih lynti ban iatreilang bad kine ki jaka treikam ban wanrah ia ka jingkylla bad ban don kti lang ha ka jingiaid lynti jong ka India sha ka jingbha,” la ong u Dr. Nidhi Pundhir, Director jong ka HCLFoundation. Ki projek kiba la ai jingkyrshan da ka  HCLTech Grant ki la wanrah ia shibun ki jingkylla ha ki rukom pynneh pynsah ha ki snem ba la leit, kaba kyntiew ia 2.3 million ki jingim ha kumba 61,000 tylli ki shnong ha India. Lyngba kane ka sienjam treikam ba la ioh jingkyrshan ne ka Grant ka la lah ban ialam sha ka jingthung ia kumba 3 lak tam ki tynrai dieng, ka jingpynkhie im biang ia ka jaka kaba heh 68,300+ hektar bad ka jingpynduna jong 67,000+ ton ka jingpynmih jong ka CO2.

Haduh mynta, palat ₹203 klur la ai ka HCLFoundation lyngba ka HCLTech Grant. Ha ka sien pynlong kaba 11 jong kane, ka Gramin Vikas Vigyan Samiti (GRAVIS) na Rajasthan, Live Foundation na Jharkhand, Goodwill Foundation na Mizoram bad Mahila Jan Adhikar Samiti na Rajasthan ki la shah jied ban ioh jingiarap kaba ₹5 klur marwei na ka bynta ki jingpyntreikam jong ki kiba kynthup naduh ki rukom pyllang um slap ha ka ri syiap jong ka Thar desert bad ka jingpynneh ia ka mariang ha Jharkhand sha ka jingpynbha jong ki lad ai jingiarap ha ka liang ka koit ka khiah ha Mizoram bad ka jingai jinghikai shaphang ka jinglong ryngkat jong ki shynrang bad kynthei ha Rajasthan.