Kular U CEM JHADC ban thawaiñ halor ka riti kheiñkur kheiñkha

Ka kynhun ki khlieh Rangbah Kur jong ka Synjuk Ki Rangbahkur Ka Bri U Hynñiewtrep kynthup ia u Bah R. L. Kharpran, Khlieh Rangbah; Bah Raphael Warjri, Saiñpyniar Lumlang; Bah RL Blah, Sangot; Bah Manstudy Nongrem bad Bah JL Khongshei bad kiwei ki dkhot ki la iakynduh ia u Kher Rangbah Ma Thombor Shiwat, CEM JHADC Dorbar Thawaiñ Dalariti Rilum Jaintia ban kyrpad na bynta ban thaw aiñ ha kaba ia dei ban pynneh pynsah ia ka riti kheiñkur kheiñkha na ka kmie ha ka thaiñ Jaintia Hills khnang ba kan long ryntih shityllup ka Bri Hynñiewtrep na ka bynta ki trai-ri trai-muluk.

Ha ka jingialang bad u Ma Thombor Shiwat ryngkat bad ki dkhot rangbah jong ka Dorbar Thawaiñ Dalariti Rilum Jaintia la pynsngew ia ka jingdonkam kyrkieh ban thaw aiñ ban iada ia ka riti kheiñkur kheiñkha na ka bei, kaba dei ka thymmei jong ka riti dustur ba synrop lang ha baroh kiwei kiwei ki riti tynrai naduh ka khyndew haduh ka longsan mansan, ka poikha poiman bad byllai kiwei kiwei ki bynta jong ka riti tynrai.

Nalor kata la kyntu ruh ba yn thaw ka atiar aiñ ka ban ai ka jingithuh ia ki Dorbar Kur baroh ha ka thaiñ Khasi Jaintia na ka bynta ban aibor ruh ia ki rangbahkur ne wahehkur ha kaba korbar ia baroh ki kam kur ha baroh kawei ka thaiñ Khasi Jaintia. Ka kynhun ka pynpaw ka jingshaniah skhem ha ka iktiar jong ka Dorbar Thawaiñ Dalariti Rilum Jaintia ba la ialam da u Ma Thombor Shiwat ba yn lah ban pynurlong kham kloi.

Na ka liang jong u Ma Thombor Shiwat ruh u la pynpaw ka jingsngewnguh ia ka Synjuk Ki Rangbahkur ba ki la kyrsiew bad noh synñiang da kaba ai lem ki dulir na ka bynta ban lah ban thaw aiñ ha ka ban pynneh pynsah ia ki riti dustur tynrai, khamtam ia ka riti kheiñkur kheiñkha na ka bei.

Na ka liang ka Synjuk ki Rangbahkur ki la kular ban aikti lem ha kano kano ka liang na ka bynta ban urlong ka kam thawaiñ ban iada ia ka riti kheiñkur kheiñkha na ka bei ryngkat ka ia syllok lang bad ka Dorbar Thawaiñ Dalariti Rilum Jaintia.