Khot tender ka AAI ban pynheh ïa ka kadliengsuiñ ha Umroi

Ka jingangnud jong ka jylla kan sa urlong noh, haba ka Airports Authority of India (AAI) kala khot ia ka ‘Tender’ na ka bynta ban pynheh ia ka kad liengsuin jong ka Shillong Airport kaba don ha Umroi.
Kane kala urlong, kadei na ka jingshimkhia jong ka sorkar jylla hapoh ka jingialam u Myntri Rangbah ka Jylla u Conrad K Sangma uba la buh hakhmat eh ia ka thong ban kyntiew ia ka kad liengsuin.
Ka jingpynheh ia kane ka kad liengsuin kan kynthup ia ka jingpyniar sa 571 mitar ia ka Runway na kaba la don lypa bad kan kot noh sha ka 2,400 mitar ha ka jingjrong bad ka jingpynheh ia ka Runway kan pynsuk ia ka jingiaid ki liengsuin kiba heh kum ka A-320 ha Shillong. Nalor kane, ha katei ka projek yn kynthup lang ia ka jingpynheh ia ki Terminal Building bad ia ka Apron bad kiwei kiwei ki jingtei kiba iadonbynta lang.
Katkum ka Tender Notice, ka mang tyngka baroh na ka bynta kane ka projek ban pynheh ia kane ka liengsuin ka long T.119.44 Klur bad ka por ban pyndep ia kane ka long khatphra bnai kynthuplang ia k i3 bnai ha ka por lyiur.
“Kane kadei ka khyllipmat kaba sngewhun bad ka lad kaba khraw ia ka Meghalaya. Kane ka jingpyllait Tender ban pynheh ia ka Shillong Airport kadei ka resol jong ka jingtrei shitom ha kine ki snem kiba la leit. Kan kyntiew ia ka kad liengsuin kam dei eh tang ban pynsuk ka leit ka wan hynrei kadei ruh ban wanrah ia ka jingkylla ha ki jingim, ban kyntiew ia ka kam jngohkai pyrthei bad khring ia ka jingwan kynshew tyngka bad bna thaw ia ki lad iohkam iohjam ia ki samla ka jylla. Shisien ba la pyndep ia katei, kumta kane ka projek ryngkat bad ka jingshimkhia ka jong ngi ban kyntiew ia ka lad ban pyniasoh ha ka leit ka wan bad ia ki kam jngohkai ha ka jylla, kan wanrah ia ka jingkylla na ka bynta ki paidbah ka Meghalaya ” la ong u Myntri Rangbah ka Jylla u Conrad K. Sangma.
Naduh ba u Conrad K Sangma ula shimti ia ka shuki Myntri Rangbah ka jylla ula shimkhia ia kane ka mat bad ka Sorkar Pdeng na ka bynta ban pynheh iaka kad liensguin jong ka Shillong Airport ha ki kyrdan bapher bapher.
Ka AAI kala dep ban aiti ia ka Draft Master Plan ban pynheh ia ka kad liengsuin ha u Nailar jong u snem 2024 bad ka jingshim ia ka jaka kaba donkam sa 22 akar na ka bynta katei ka projek kala iaid shakhmat. Da ka jingthmu ban pynheh ia ka kad liengsuin la khmih lynti ba kan kyntiew shuh shuh ia ka jingpyniasoh bad ki wei pat ki nongbah kiba don ha ka ri India, kaban plie lad ruh ban wan tuid ki nongjngohkai, ka kam khaii pateng bad kiwei kiwei.
Ka sorkar Meghalaya kala buh ia ka thong ban pynlut ha ka kam jngohkai pyrthei kumba 4,000 hajar klur ban shna ia ki jaka jngohkai pyrthei kiba thymmai bad ruh ban pynbha ia kiba la rim. Ka sorkar kan trei shitom ban pynioh ia ki nongbei tyngka ban shna thymmai ki Resort kum ha Umiam, Shillong bad ha New Shillong bad kane ka plie ka lad ioh kam ioh jam ia ki samla ka jylla.
Ha u bnai Nohprah 2024, ka sorkar kala dep ban buh ia u maw nongrim na ka bynta ka Shillong Ropeway Project, hapoh ka jylla ka ban kit briew da ka jingthmu ban pyniasoh bad ki jaka jngohkai pyrthei ha kylleng ki jaka ha sor Shillong ban kyntiew ka kam jngohkai pyrthei bad ka leit ka wan ha sor.
Ka jylla kala pynlong ruh ia ki tamasa kiba iadei bad ka jingriewspah ka kolshor kum ka Shillong Cherry Blossom, Me’gong Festival ha Tura, bad ka Winter Tales, ha kaba kila ioh ia ka jingithuh na ka ri bad na shabar ri ha ka jingkyntiew ia ka sap ka phong, ka tem ka put, ka bam ka dih bad kiwei kiwei.
Kumta ka jingpynheh bad jingpyniar ia ka kad liengsuin kan kyntiew shuh shuh ia ka jingwan jong ki nongjngohkai sha ka jylla.