Ki phadar bad sister na Kerala ki la aiti met bad mynsiem ban shakri ia ka Meghalaya

U Myntri Rang-bah ka Jylla Meghalaya u Conrad K Sangma ha ka sngi Saitjain ula leit shim bynta ha ka jingrakhe ia ka Episcopal Silver Jubilee jong u Moran Mor Baselios Cardinal Cleemis, u Major Archbishop jong ka Balang Katholik Syro-Malankara bad u Major Archbishop jong ka Trivandrum. Ia ka jingialang la pyn-long ha Trivandrum ka jylla Kerala ha ka jingdonlang u Dr. Joseph Mar Divanasios (Metropolitan of Kollam Diocese, Malankara Orthodox Syrian Church) u Myntri Rangbah ka jylla Keralam u V.D. Satheesan  Cardinal Filipe Neri Ferrão, President jong ka FABC, u Rev. Dr. Varghese Chakkalakal, President Kerala Catholic Bishops’ Council, ki rangbah balang bad u Myntri sorkar pdeng u Suresh Gopi, u MP Lok Sabha Shashi Tharoor bad kiwei kiwei.

Haba ai jingkren ha ka jingialang, u Myntri Rangbah ka Jylla Conrad K Sangma u la ai khublei ia u Beatitude halor ka jingshakri ha ki 25 snem bad u la iaroh ia ki jingnoh synniang jong u ha ka pule puthi, ka koit ka khiah bad ka jingshakri ia kiba duk ha kylleng ka ri bad shabar. U la pynkynmaw ïa ka jingïadei jong u bad u Cardinal Cleemis la palat shiphew naduh ba ki la ïakynduh ha Vatican ha ka por ba pynlong riewkhuid ïa ka St. Mother Teresa. U Myntri Rangbah ka Jylla ula ong ba ka jinglong sngewrit jong u Cardinal Cleemis ka pynlong ïa ka jingïadei kaba neh. Kumjuh ula pynkynmaw ruh ïa ka jingïadei paralok ba jan hapdeng u Cardinal Cleemis bad u kpa jong u ba la khlad noh u P.A. Sangma bad ula ong, ka long ka burom ban wan na Meghalaya ban don bynta ha kane ka sngi kaba kongsan.

U Myntri Rangbah ula ai burom ïa ki mishonari ha Meghalaya bad ka thaiñ Shatei Lammihngi bad ula ong, “Shuwa ba ki Sorkar kin wan, dei ki Mishonari Khristan ba shakri ïa ki briew jong ngi. Shuwa ba kano kano ka tnad kan plie ïa ki skul ne ki PHC, dei ki mishonary kiba ai ïa ngi ïa ka pule puthi bad ka koit ka khiah khlem da pyrkhat ïalade.” U la bynrap u kpa jong u, ba la khlad noh u dei uwei ba mih na ki mishonari bad ka jingim ba la pynrung da ka Balang ki dang iai bteng ha ka jingsynshar jong u. U la ai khublei ïa ka jylla Kerala halor ka jingnoh synñiang ha ka jylla Meghalaya ha kaba bun ki phadar bad sister na Kerala, kynthup ïa u Auxiliary Bishop C. J. Jose bad ka Sister Rose Paindapally kiba la shakri palat 40 snem ha ki jaka kyndong ka Garo Hills, ki la aiti lut ïa la ka jong ka jingim ban shakri ïa ki paidbah ka jylla.