U MLA ka Mawryngkneng Constituency u bah Heaving Stone Kharpran ha ka sngi Saitjain, sa shisen u la ioh ban sam biang ia ka MLA Scheme kaba la pynkmen bad pynhun ia ki paidbah ka thain, kaba u la sam ha phyllaw jong ka iingsah jong u kaba don ha Mawlynrei.Ha kane ka sngi la sakhi lang da u MDC ka thain, u bah Bill Clinton Wankhar, ha ka jingdon ryngkat u Secretary ka By Election Committee jong ka VPP, u bah F. Kharpran, nangta kiwei pat ki nongkikam jong ka party, ki nongiarap jong ka party, ki longkmie, ki rangbah bad ki samla. Kine ki scheme kiba la sam sha ki paidbah ha ka sien kaba ar lane ka 2nd Installment ki kynthup ia ki kor suhjain, ki scheme shimet, ki scheme ri jingri, ki scheme rep, ki scheme misteri bad kiwei kiwei kiba baroh kiba ioh jingmyntoi ki long 412 ngut bad ryngkat ka jingioh jingmyntoi ki skul, ki dorbar hall shnong, bad kiwei pat ki jingdonkam ki la kot ha ka jinglut kaba 1,52,21,000 tyngka tang ha ka 2nd installment.
U MLA haba ai jingkren u la batai shai bin pa bin ia ki jinglut ha kaba iadei bad kane ka jingsam ia ki MLA scheme kaba la pynhun ia ki paidbah kiba sngap bad shah shkor ia kane ka jingpynshai.U la ong RUH ba watla bun kiba la kynthoh ia u ha ki rynsan social media ba u leh shilliang bad u peit briew, hynrei kum u kpa ka constituency, u trei na ka bynta ka jingbha jong baroh bad watla ka constituency ka dei kaba heh tam ha baroh kawei ka jylla bad ka Ri, u hap ban peit ba baroh ki dei ban ioh katjuh kumba dei ban ioh.Ia ki scheme kiba la pyllait ha kane ka sngi, 140 ngut ki dei kiba ioh ia ka kor suhjain ha ka jinglut kaba 13,30,000 tyngka, 56 ngut kiba ia ka jingiarap ban seng dukan ha ka jinglut kaba 4,60,000 tyngka, 43 ngut kiba ioh na ka bynta ka kam rep ha ka jinglut kaba 4,30,000 tyngka, 47 ngut kiba ioh jingmyntoi ha kaban pynbha ia ki iing ki sem ha ka jinglut kaba 6,58,000 tyngka.Nalor kine, ki don 73 ngut kiba ioh da ks scheme ri sniang ha ka jinglut kaba 7,30,000 tyngka, 48 ngut kiba ioh jingmyntoi ha ka kam misteri ha ka jinglut kaba 4,80,000 tyngka, 5 ngut kiba ioh jingmyntoi ha ka kam beauty parlour ha ka jinglut kaba 70,000 tyngka, 6 ngut ha kaba iadei bad ka kam ri syiar ha ka jinglut kaba 60,000 tyngka, arngut kiba ioh jingmyntoi ban shna sem sniang ha ka jinglut kaba 20,000 tyngka, iwei ba plie ia ka dukan shna tyre ha ka jinglut kaba 14,000 tyngka bad iwei ba ioh jingmyntoi ha ka kam shna cake iba ioh ia ka scheme kaba 14,000 tyngka.
Katkum ka jingkhein kyllum lang ia baroh, ka jingioh na ki scheme shimet ki long 42,66,000 tyngka, ma ka Community Based Activities ki long 82,85,000 tyngka bad na ka CMSDF kaba wan ha ka 2nd installment ka long 26,70,000 bad baroh ki jinglut jingsep ha kaba iadei bad ki scheme kaba la aiti da u MLA sha ki paidbah ka la kot haduh 1,52,21,000 tyngka.La pyntip ba haduh 6 tylli ki skul bad ki training center, ki dorbar hall, ki solar light ha 3 tylli ki shnong, ka water pump ha kawei ka skul ki dei kiba la ioh jingmyntoi na kane ka scheme ba la wanrah ka u MLA jong kane ka thain. Ha kane ka sngi la ioh ruh ia ka jingkren na u MDC uba la iaroh ia ka jinglah jong u MLA ka thain ba watla ki don ha ka liang pyrshah, khlem da khein ia ka jingiapher, u la wanrah ia kiba bun ki scheme pynroi ha ka thain la ki dei ki scheme sorkar jylla lane ka scheme sorkar kmie.