Kyllon iap 4 ngut ki runar ha ka jingiasiat bad ki pulit ha Songsak

Saw ngut ki runar ba la ithuh kyrteng u Allason Marak, u Sustom Kalam Ali bad u Bobidul Islam Rabha ki la kyllon iap hynne ka sngi ha ka jingiather kuli bad ki pulit ka Meghalaya ha Songsak ha East Garo Hills.Katkum ka kyrwoh khubor na u Superintendent of Police (SP) ka East Garo Hills u Pawar Swapnil Vasantrao ula ong, ki pulit ki la ioh jingtip kine ki runar ki la iaid sha Songsak, East Garo Hills, da ka jingthmu ban rahbor ia ki nongtrei jong ka National Highways & Infrastructure Development Corporation Limited (NHIDCL) ban dawa pisa. Ka kynhun pulit ba kynthup ki ophisar bad ki dkhot jong ka Anti-Terror Squad (ATS) ryngkat ki pulit ka East Garo Hills District Police bad ki pulit ka Songsak Police Station la pynap ban khanglad ia ki briew ba suba sniew.U SP ula ong hadien ba ioh jingtip na ki bor syntiat, ka kynhun pulit ka la pyllong ia ka jingkhynra ha Songsak Reserve ha shilynter ka surok Dagal-Songsak ha ka por mynstep ka 30 tarik Nailar,2026.

U Swapnil ula ong, ba ha ka step jong ka 30 tarik Nailar, 2026 ki pulit ka East Garo Hills ki la pyllong ia ka jingtalasi hadien ba la ioh jingtip ia ka jingdon ki runar ha katei ka thain hynrei katba ki pulit ki dang ai dak ba kin pynsangeh, kine ki runar ba wan da ka Bolero ki la synreit kuli pynban ia ki pulit bad kane ka la pyllong ia ki pulit ban pynphai kylla haduh ba saw ngut ki la mynsaw jur bad iap ha jaka sumar.“Ha ka por 4 baje mynstep kawei ka kali Bolero ba don ia u nombor AS-01-FD-2889 la iohi ba ka pyrshang ban wan sha Songsak. Ki pulit ki la ai dak ban sahngeh ban talasi, hynrei kitei ki runar ki la synreit kuli ia ki pulit. Ka kynhun pulit ruh mar mar ki la siat ban iada ialade. Ha kane ka jingiather kuli mar kylliang, ka kali pulit ruh ka la shah synreit bad ka la julor,” ong u SP.U SP ula ong hadien ba la sangeh ka jingiasiat, la talasi ia ka kali bad la lap ia saw ngut kiba mynsaw hapoh kali.Ia kine ki saw mar mar la rah noh sha Songsak PHC na bynta ban ioh ka jingsumar bad la phah ban pynkit noh sha Williamnagar Civil Hospital. Hynrei ki bor ka Williamnagar Civil Hospital ki la pynbna ba kitei ki briew ki la khlad shwa ban poi sha Hospital.

La ong ba kine ki runar ba shah siat ki dei kiba ju donkti ban leh ia ki kam beain ha Meghalaya bad Assam.Kine ki saw ngut ba khlad la ithuh kyrteng u Allason Marak na ka shnong Mendima ha North Garo Hills, uba donkti ha ka jingjia dang shen ha Damra ha kaba uwei u nongkhaii u la shah siat iap.U Sustom Rabha uba dei Goalpara, Assam uba la ju leh ki kam bymman bad bun ki mukotduma ba la rejistar ha kylleng kynthup ha Assam bad Meghalaya, khamtam ha Dudhnoi, Mendipathar bad Dadenggre Police Stations, kynthup ha ki kam lute, rahbor bad kiwei ki kam beain.Katba u Kalam Ali udei u nongshong shnong Goalpara, Assam uba don bynta ha ki kam bymman bad u Bobidul Islam u nongshong shnong ka Goalpara, Assam.Ka khubor na u SP ka la iathuh na kine ki runar la ioh ban kurup ar tylli ki suloi bad ki kuli ba la pyndonkam ha ka por ba iasiat bad ki pulit. Kawei na ka suloi ka don ia ka jingthoh “Beretta” katba kawei pat ka suloi ka jingthoh kam shai shuh.Halor kane, u SP ula ong na ka liang ki pulit ki dang pyllong ia ka jingtohkit ba bniah katkum ka ain. Ula kyntu ia ki paidbah ba ki dei ban kiar na ka jingpynsaphriang ia ki khubor hamsaia bad ki jingtip bakla bad na ka liang ki pulit ki trei shitom na bynta ban pyntikna ban don ka jingshong shngain jong ki paidbah.