Lada ka jingpynkylla ia ka FCRA ban klun ne pynduh jait kan long ka ain iakjakor’

U Father Richard Majaw uwei na ki riewniam ka Balang Katholik ula pynpaw ba ka jingwanrah ka sorkar pdeng ban pynkylla ia ka ain Foreign Contribution Regulation Act (Amendment) Bill 20206, ban pynbeit ia ki jingbakla, ki jingduna, kan long kaba bha eh, hynrei lada ka thmu ban klun, ban pynduh jait iano iano, kata kan long kum ka ain akjakor pynban.

Ha ka jingiakren bad u Father Richard hynne ka sngi, ula ong ba u kren ia kane kum u nongshong shnong ka ri India, ym dei na kano kano ka kynhun niam namar ba ka FCRA ka dei ia baroh ki kynhun niam. Ka FCRA ka dei ka ain ha ri India bad bun ki Society ne ki kynhun bapher bapher kiba ioh jingiarap na ka FCRA kynthup ki kynhun Balang.

U Father Richard ula ong ba u sngew dei ba ka sorkar pdeng kan pynbeit ia ki jingioh pisa kiba wan nabar ri hynrei kam dei ban shu shim noh ia kano kano ka jingdon jingem jong kano kano ka kynhun bad ula ai nuksa ba lada kano kano ka skul ka ioh pisa nabar ban pyniaid hangne, lada ka pyndonkam bakla, ka sorkar ka lah ban pynduh noh ia ka jingai jingbit, ym ban kurup ne ban shim noh ia kata ka skul ym ban don ka bor ban knieh ne shim ia ka jinglong trai.

“ Ngi sngewdei hi ba ka sorkar kadei ban pyniaid ia ki jingioh kiba wan sha ri India hynrei kam dei ban long da ka jingthmu ban shim ban lilam ia kiei kiei kiba ka seng ne kynhun ka tei,” ong u Father Richard.

Kumba ka long mynta ia ka FCRA Amendment Bill la phah sha ka Joint Parliamentary Committee (JPC) jong ka Parliament ban eksamin bniah.

U la ong ba kino kino ki ain kiba ka sorkar pdeng ka wanrah, lada dei ka jingmut ban pynbha, ban pynbeit ban pynbiang kan long kaba bha eh hynrei lada ka wan ban klun, ban pynduh jait iano iano, kata ka dei ka ain akjakor kaba hap ban duwai ia u Blei ba kum kita ki ain kim dei ban wan ha kane ka ri India.

Ha kajuh ka por, u la ong ba baroh ki kynhun niam ki don ban tei ia ka imlang sahlang, ban pynbha ia ki briew bad kam dei ban leh ia kaei kaei kaba long pyrshah ia ka ri.

“ Baroh ki kynhun niam kiba don hangne kidei na bynta ban tei ia ka imlang sahlang. Ka jingpyrshang jong ngi ban ioh jingiarap kam dei ban pyndonkam bakla ne ban leh ia kaei kaba long pyrshah ia ka ri. Hynrei ka jingthmu jong ngi ka long ba kano kano ka jingiarap ba ki ioh ka long ban tei ia ki nongshong shnong ha ka imlang sahlang,” ong u Father Richard bad bynrap ba kum kine ki ain, ym dei ban wanrah ha India namar ba kan wanrah ia ka jingkulmar, ka jingsniew bad kan wanrah ka jingthut ia ki kam ba bha kiba ki seng bapher bapher ki pyrshang ban wanrah ha ka ri India baroh kawei.