Mynta yn kyndang nongdie madan ka SBM na Laitunkhrah sha Bungalow Brightwell

Ka Shillong Municipal Board (SMB) ka la buh por khadduh lashai ka sngi ka 17 tarik Nailar, 2026 ia ki nongdie madan na ka thain Laitumkhrah ba kin kynriah noh sha ki jaka ba la pynbit pynbiang ka sorkar sha Bungalow Brightwell, Barik.
Katkum ka jingpynbna ka Shillong Municipality Board kaba 16 tarik Naitung 2026, la pynbna ba ia ka thain Laitumkhrah, Dhankheti, Barik, Phan Nonglait Park, Redcross Laban, Lumshatsngi la pynbna kum ki No Ven-ding Zone ne ki jaka bym shah ban die madan bad ki dei ban kynriah noh sha SMB Parking Lot ha Dhankheti bad ha phyllaw ka Brightwell Bungalow, Barik.
Ki nongdie madan kiba don ia ka Certificate of Vending (CoV) kin hap kynriah noh na kitei ki jaka shwa ka 17 tarik Nailar 2026 bad kiba ialeh pyrshah kin hap ban shah tan ha ka ain katkum ka Meghalaya Street Vendors (Protection of Livelihood and Regulation of Street Vending) Scheme 2023.
Kiba ialeh pyrshah ban die jingdie ha kitei ki jaka kin shah weng mardor ha ka bor jong ka ain, la ong ka kyrwoh na u chairperson ka Town Vending Committee & Chief Executive Officer ka Shillong Municipal Board.
Lah ban kdew ba ha kine ki sngi, ki nongdie madan na ka thain Laitumkhrah kila leit ban pynpaw ia ka jingpyrshah hakhmat ka ophis ka Municipal halor kane ka jingpynkhreh ka sorkar ban pynkynriah noh ia ki.