Na ka talasi mynder ka HANM, lap pynban ïaka jingpawnam ka Markham

Ka seng Hynniewtrep Achik National Movement, Eastern West Khasi Hills District haka 1 tarik u nailar 2025, kala sdang ïaka jingtalasi mynder ban peitngor ïoh don ka jingwan rung tuh ki nong Bangladesh naka jingshah beh na Assam. Ha kane ka jingkynra mynder ka seng HANM naki kali ha lad Kyllang ha ka surok Mairang – Rani Godown ym shem la lap uwei ruh u nong Bangladesh hynrei la lap pynban ïaka jingtuid ki nong Assam sha Markham. Lajan baroh ki nong Assam kiba ïaid lyngba ïa kane ka surok ha kane ka sngi, kiba la wan daki phew tylli ki kali bad ki arshaka kila ïathuh ba kin leit peitkai ïaka Markham, kawei naki jaka jngohkai kaba don ha Eastern West Khasi Hills District.

U President ka seng HANM ka Eastern West Khasi Hills District u bah Artis Ryntathiang u la ïathuh ba ka seng kan ïai bteng ban pynlong ïaka jingtalasi mynder ban khang lad ïaka jingwan rungtuh ki nong Bangladesh sha ka jylla kiba la shah beh na Assam. Ka seng kala kyntu ruh ïaki paidbah ba kin ïashnohktilang bad ka seng ha kane ka jingkynra mynder bad kin sngewbha ban pyntip sha ka seng ne sha kino kino ki sengbhalang lada ki lap ïaki mynder hangno hangno.

Ha kane ka jingkynra mynder ka seng HANM, la sakhi ruh ïaka jingïadon bynta lang ki pulit ka Eastern West Khasi Hills District kiba la ïa talasi mynder ryngkat ryngkat bad ka seng HANM.