Noh shiliang ka jingsiew Pension ia ki Nonghikai bad Nongtrei skul Deficit

Ki nongialam ka Employee of School & Colleges hapoh ka Deficit Grant In Aid ki la pynpaw ka jingbynniaw halor ka jingbym khot ryntih ka sorkar ia ki nonghikai ha ka jingialang ban iakren halor ka jingeh jong ki haba ia dei bad ka bai bam tymmen ne ka Pension Scheme, 2026.

Ki nongialam ha kane ka sngi ki la pynpaw ruh ka jinglyngoh ba ka sorkar ka la khot jingialang tang ia ka kynhun KJDSTA bad MCTA bad kam shym la khot ia ki kynhun na rilum Garo kiba kynthup ka GHDSTEA bad MCNTEA.

“ Ka long ka bym sngewtynnad ba ka sorkar ka la leh klet ia kitei ki ar tylli ki kynhun bad ka la khot pynban ia kito ki bym don bynta eiei ha kane ka kam,” ong u bah Boswel Pala haba kren sha ki lad pathai khubor.U bah Boswel Pala ula ong ba ka jingdawa jong ki, ka long ban pyntreikam noh ia ka National Pension Scheme (NPS) katkum ka Office Memorandum (OM) ba la phah sha ki ha u snem 2023 bad ia ka skhim jong u snem 2023, ym ban pyntreikam ia ka skhim Meghalaya Non-Government School and College Employees Centralised Provident Fund Scheme, 2026.

Ki la dawa ruh ba ka sorkar kadei ban weng mardor ia ka shithi ba la phah sha ki skul bad kolej ban pynrung kyrteng ha ka PRAN hapoh ka skhim 2026, khnang ban lait na ka jingkulmar bad dei ban khot jingialang ia baroh ki nonghikai bad ki nongtrei Deficit ha ka jylla.

“ Haba ngi la pynsngew ia ka jingsngewkhia bad ka jingduna jong kane ka skhim 2026, ka sorkar ka la leh mynleh pynban ba baroh ki iaid beit iad ryntih,” ula ong.

Na ka liang ka kong Amanda Basaiawmoit ka la ong ba bun kim sngewthuh kaei kata ka CPF bad ka Pension bad bun ki briew kiba sngap ia ka jingpynbna ka sorkar, ki la pyrkhat ba ka sorkar ka la leh bha ia ki nonghikai.

Ka kong Amanda ka la ong ba ka CPF kadei kaba ki shah khate man la u bnai na ka tulop jong ki ban pyllang ban ioh bam ka bai tymmen namar naduh mynshwa ki nonghikai kim ju ioh pension bad ynda ki shongthait kin bam da kaei namarkata da kane kaba ki kynshew jong ki, ki ioh ban bam.

Ka la ong ba kum ki nonghikai ki la pdiang bad bud ia kiei kiei ki jingbthah ka sorkar naduh u 2023 ter ter, hynrei mynta u snem 2026 ha u bnai Kyllalyngkot, la wan ka shithi na u Commissioner Secretary ka tnad Pule Puthi u Vijay Kumar Mantri ba la pynmih ia ka Draft Pension Skhim,2026.

“Ia kane ka skhim 2026 ngi la kyntait. Hynrei haba ngim treh ka sorkar ka la shu pynmih syndet ka jingpynbna ban pyntreikam noh ia kane ka skhim. Kumno ngi kiba thep ba kynshew ia ka pisa, ngi khlem ia ong hoid hynrei ka sorkar ka la shu thombor ia ngi ba ngi hap ban leh beit,” ka la ong.

Ha kajuh ka por, ka la ong ba kane ka skhim 2026, ka long kum ka Insurance skhim ha kaba 50 percent kila ban shim ia ka pisa.