Plie u Conrad ia ka ophis Meghalaya Public Service Commission ha Tura

U Myntri Rangbah ka jylla u Conrad K. Sangma hynne ka sngi ula plie paidbah ia ka ophis treikam jong ka Meghalaya Public Service Commission (MPSC) ha Dakopgre, Tura, West Garo Hills.Ha kane ka sngi la donlang u Lamphang ka Iing Dorbar Thawain ka jylla u Thomas A Sangma, u Deputy Commissioner ka West Garo Hills u Vibhor Agarwal, Abraham T. Momin, Chairman, Tura bad kiwei ki ophisar na ka Meghalaya Public Service Commission nalor kiwei ki tnad sorkar.

Haba kren ha kane ka sngi, u Conrad ula ong ba ka jingdon ka ophis MPSC mynta ha Tura kan ai jingmyntoi ia kiba bun ki samla ka rilum Garo, ha kaba mynta kim donkam shuh ban iaid da ki 10-15 kynta ban leit sha Shillong na bynta ban ialeh ia ka eksamin.Ula ong, “ Mynshwa ki samla haba ki iakhun ia ka eksam ki hap ban pyllut por da ki 10-15 kynta ban poi sha Shillong ban iakhun ia ka eksam. Hynrei mynta na ka jingdon kane ka ophis, ki samla ki lah ban iakhun ia ka eksam bad ki interbiw ha Tura.”

U la ong ba ka jingiaid lynti jngai khlem shongthait ka ktah ia ka jingiakhun eksam ki samla. “ Kane kadei kawei na ka ophis kaba donkam eh bad lyngba ka jingdon kane ka ophis kan iarap ia ki samla bad kan plie lad ruh ia ka lawei jong ki samla,”ula bynrap.U Myntri Rangbah ula pynbna ruh ba ka eksam ba nyngkong eh ban long ha MPSC Tura kan long ha ka 14 tarik Naiwieng 2025.Ula bynrap ruh ba ka sorkar ka don ia ka jingthmu ban pyniar sa shaduh sha Jaintia Hills, khnang ban pyntikna ba baroh kin ioh ia kajuh ka jingshakri bad ka jingmyntoi ha ka jylla.Katba na ka liang u Lamphang u Thomas A. Sangma ula ong ba ka jingplie ia kane ka ophis kan dei ka dak jong ka jingsdang ia ka jingiaid lynti ba thymmai, kaba shai bad kaban lah ban ai ka jingshakri kaba long salonsar sha ki paidbah.