Pyndem ki nongdie madan Laitumkhrah bad leit shong dukan ha ki jaka sorkar

Watla ki nongdie madan ka thain Laitumkhrah hynne ka sngi ki la shah pynkynriah lut sha ka jaka ba la pynkhreh ka sorkar, ka Meghalaya and Greater Shillong Progressive Hawkers and Street Vendors Association (MGSPH&SVA) ka la ong ba kan wad lut ia ki lad ki lynti, kynthup kan leit ruh sha iing kashari na bynta ban iakhun ban pynioh ia ka Certificates of Vending (COVs) na bynta ki nongdie madan ki bym shym la ioh.

U General Secretary ka seng ki nongdie madan u bah Shane Thabah ula ong, ba ki nongdie madan kiba la ioh ia ka COV kim don lad hynrei ki hap ban shu hun ban kynriah sha ka jaka ba la pynkhreh ka sorkar ha Brightwell Bungalow bad ha jaka set kali ka Shillong Municipal Board (SMB) ha Dhankheti.

U bah Thabah ula ong ba ki don bun ki nongdie madan kiba sngewkhia ba lada ki bteng ban iakhih ka lah ban ktah ban shah khnieh ia ka COV jong ki bad kane ka la pyllong ia ki ba kim banse ban kohnguh ia ka jingpynkynriah ka sorkar.

Ula buh jingkylli la ka jaka ba ai ka sorkar, kan ai kajuh ka kamai kumba long ha Laitumkhrah bad ka sorkar kadei ban bishar ia kane ka jingshim rai lada ka ktah ia ka kamai kajih jong ki nongkhaii.

Na ka liang ka seng kan leit sha Provisional Town Vending Committee (PTVC) ban dawa ba kadei ban bishar thymmai ia ki jingdawa bad jingujor jong ki nongdie madan kiba la shong die madan ha katei ka thain, khnang ba kin ym shah iehnoh.

Shuh shuh u bah Thabah ula ong ba dei ban don ka jingsurbe ba tikna ban ithuh ia ki nongkhaii kiba dei hok ban ioh ha shwa ban sam ia ka COV. Ula ban jur ba ha shwa ban shim ia ka rai ban ai jaka dei ban kynthup lang ia ka Town Vending Committee.

“Ki don bun ki nongdie madan kiba im kamai jakpoh ha Laitumkhrah da ki phew snem bad ki shaniah tylli na ka kam die madan ban kyrshan ia ka longiing jong ki,” ula ong.

Ha kajuh ka por, na ka liang ki nongdie madan, don kiba pynpaw ba ki hun bad ki kmen ia ka jaka ba ka sorkar ka ai bad don katto katne kiba la pynpaw ba kim shym la hun satia ia kane ka jingpynkynriah ka sorkar, hynrei kim banse ban pdiang.

Uwei na ki nongdie madan uba la shong dukan naduh u snem 2004 ula pynpaw ka jingsngewkmen ia ka jaka ba la ai da ka sorkar hynrei ula pynpaw ruh ka jingsngewkhia la kane ka jaka yn don ki nongthied ban wan.

Kawei ka longkmie kabym shym la ioh ia ka COV ka la ong ba da ki phew snem ka la shong dukan ha Laitumkhrah hynrei kam shym la ioh ia ka lisen, bad ka la rai ba kan shong die beit ha ka jaka ba ka ju shong.