Pyniasoh U MLA barim Bah Mohendro Rapsang sha ka BJP

U MLA barim ka West Shillong constituency u Bah Mohendro Rapsang ula wan phai biang sha ka jylli sain pyrthei ha dien ka jingleit iasoh sha ka Meghalaya Bharatiya Janata Party (BJP).Haba kren ha kane ka sngi u Bah Mohendro ula kular ban trei na bynta ka roi ka par ka Meghalaya hapoh ka jingialam u Myntri Rangbah Duh ka Ri india u Narendra Modi.Ia u Bah Rapsang la pynrung sha ka BJP ha ka jingialang ba la long ha Shillong ha ka jingdonlang da u President ka Meghalaya BJP u Rikman G Momin bad u Myntri Sorkar u Bah Sanbor Shullai, ha ka jingiadon ryngkat ki nongtrei ka party bad kiwei kiwei.Haba shim kum ka sien kam ba don burom, u Bah Rapsang ula ong ba ka rukom pyniaid ia ka synshar khadar da u Modi ka la khring ia u ban wan phai biang sha ka kam shakri paidbah.

“Nga sngew burom ban iasoh bad ka BJP mynta ka 23 tarik Jylliew bad ban ieng ha ryngkat ki rishot ba khlain bad ka kiew shaphrang jong ka ri India” ula ong.“Hapoh ka jingiohi jngai bad ka jinglong nongialam jong u Myntri Rangbah Duh u Narendra Modi, ka India kala nang kiew da ka jingkhlain, jingsngew skhem bad ka jingioh burom ha ka pyrthei. Ka jingaiti jong u ban tei ia ka Ri, ka jingpyrshang ban pynkylla ia ka India sha ka ri kaba kiew bad ba shaniah halade, kala ai mynsiem ia nga ban aiti ialade ha kaban pynbteng ia ka jingshakri paidbah”la ong u Bah Rapdang.Une u MLA barim ka Congress, uba leit iakhun pat ia ka ilekshon MLA 2023 na ka ticket ka NPP bad shah rem ha u kyrtong ka UDP Bah Paul Lyngdoh, ula ong ba ka jingpynleit jingmut jong u mynta kan long halor ka jingangnud ki paidbah ha ki shnong ki thaw.“Ka BJP ka la kren shai ba ngi hap ban sngap ia ka jingangnud jong ki paidbah bad kane ka dei ka jingthmu ba ngan jam shakhmat bad aiti ban trei naduh ka mynsiem na ka bynta ka bha ka miat jong ki paidbah” ula ong.

Haba pdiang ia ka jingwan iasoh u Bah Rapsang, u President ka BJP ula ong ba kam don satia kano kano ka jingkular ba ai ticket hapoh ka BJP.Ula ong ba ka party ka iai plie ia ka jingkhang ia ki nongialam kiba kwah ban pynkhlain ia ka party hynrei ula ban jur ba ka jingai tiket kam dei satia kaba thikna.“Ngi pdiang ia u MLA barim Bah Mohendro Rapsang. Ula iasoh bad ka BJP mynta ka sngi bad ngin sa iatreilang nangne shakhmat” ong u Rikman.