Pyntip u Myntri ba ioh pdiang jingtyrwa ka tnat ban tei ia ki skul EMRS

U Myntri ka pule puthi Bah Lahkmen Rymbui hynne ka sngi u la pyntip ka tnat kala ioh pdiang ia kiba bun ki jaka ha kylleng ka Jylla, na ka bynta ban shna ia ki Eklavya Model Residential Schools (EMRS).Haba iakren bad ki nongpathai khubor u Bah Lahkmen u kubur ba ki la don ki jingtynjuh hangne hangtai hynrei u la iaroh pat ia ka jingiatreilang bad ki shnong ki thaw da kaba ong ban pynioh jaka ban tei ia ki skul.“Kam long kaba suk ha jylla Meghalaya ban sdang ia kino kino ki projek. Haba nga ong ia kata, nga ai khublei ia ki shnong ki thaw, ki trai jaka kiba la ai jaka ban tei ia ki EMRS” u la ong.

“Ha kiba bun ki jaka, la dep ban ithuh ia ki jaka bad ia ka jaka la dep ruh ban aiti sha ka tnad ba kan leh noh ia kaba donkam” ula ong. Halor ki jingkynnoh, u Bah Rymbui ula ong ba ki artylli ki skul kiba la dep, kaba kynthup ha Paham bad Samanda kidei kiba la dep ban mang lypa, kaba la pyntrei da ka jylla bad kila sdang treikam naduh u Nailur.

“Hadien katei, mynta ia ki kam ki jam ban tei ia ka EMRS kala pyniaid shakhmat da kiwei pat ki bor kiba dei khmih” ula ong bad ka bynrap “Dang ha shwa une u bnai ba mynta, u Myntri Rangbah ula leit jurip ia kawei ka jaka ha Umladkhur, Amlarem Sub Division ha kaba la buhpor ban pyndep ia ka jingtei ha ka 21 tarik u Lber 2026. Kumta ngi khmih lynti ba ngin lah ban sdang noh ia ka jingpyntreikam ia ka jingpule ha ka samoi ban wan”.U la ong ba shisien ba la dep ban tei ia ki skul kawei hadien kawei pat ha kine ki snem ban wan, kitei ki skul kin sa sdang treikam noh.