Thaw committee ka JHADC ba shah ktah ki trai ri ba ai trading licence ia ki bar jylla

U Awhai Andrew Shullai ha ka sngi ba khatduh jong ka dorbar mang tyngka ka JHADC hynne ka sngi, lyngba ka Resolution ula ai jingmut ia ka executive committee jong ka JHADC ba kan thaw da ka committee ba kyrpang ka ban peit bniah halor ka jingshah ktah ki briew ka thaiñ na ka daw ka jingioh trading licence laitlan ki bar Jylla ban wan seng kam seng jam haki shnong ki thaw jong ngi.

Haba kren halor kane ka mat u ong, haoid ym shym la khang iaki bar Jylla ba biang ki kot ki sla ba kin wan seng kam shaka thaiñ jong ngi, tangba jingshisha ymdei ban ai licence naka bynta ka juh ka kam bala don lypa da ki briew ka thaiñ ba trei haki jaka ba marjan, namar kumba long mynta bun kiba la ud la nam halor ka jinghiar ka iew ka hat ka kamai kajih jong ki naka daw bala bun ki bar Jylla ba wan seng marjan ia kajuh ka kam.

Kumta ula ai jingmut ba dei ban thaw daka committee ba kyrpang ka ban peit bniah bad lada lap iaka jingshahktah ki briew ka thaiñ naka jingdon ki dukan bar Jylla dei ban pynduh pyndam syndon noh iaka licence jong ki.

Halor kane u EM u Jessie Suiam ula pynshai ba naka liang ka council kam shem la iaid lait naki kyndon shwa ban ai licence, ki peit iaki kot ki sla ba biang ha ryngkat ki NOC naki waheh shnong, da kaba shaniah ruh haki waheh shnong ba kila ibit iaka jait kam ha ki jaka ba don haka shnong jong ki.

Bad halor kane ka jingtyrwa u Andrew Shullai ban thaw ka committee ba kyrpang u EM ula kular ban rah iakren hapoh ka Executive Committee.