Ujor ka JSU sha u DC, ba sam duna u khaw rashon sha ki paidbah

Hadien ka jingujor ki paidbah na kylleng ki shnong ba duna kilo u khaw rashon ba la sam da ki nongsam rashon ha ki shnong ki thaw kaba la ktah ia ki khamtam na ki longïing ba duk, kumta hynne ka sngi ka Jaiñtia Student Union Central Body hapoh ka jingialam u General Secretary u Nielkee Mukhim, u Ryngkat Diengdoh Vice president JSU Central body, u Phonelang Surong President JSU Mynsngad Unit, ka la leit ujor sha u DC ka West Jaiñtia Hills District u Abhinav Kumar Singh, ba u dei ban tuklar halor kane namar ba ktah shaba palat ia ki nongbam khaw rashon ba kim ioh shuh ia u khaw katkum ka hok ba la mang ka sorkar.

Ka ka jingpyrshang ka JSU ban leit wad jingtip na ki nongsam rashon (dealer), ma ki ruh ki la kynnoh dei ba ki ioh pdiang duna u khaw da kaba ki pyni ha ka jingthew ia ka jingduna kilo u khaw ha ka shi byrni, hynrei kim shym la iathuh pat la u khaw ba ki ioh pdiang lut baroh man la u bnai u biang kilo ne em kumba la mang sha ki nongioh myntoi wat haba don ki byrni ba duna kilo.

Halor kane ka seng ka la kyntu ia u DC ba un phah leit jurip ia ki bor ba dei peit bad ma u ruh ula kular ban shimkhia. U Phonelang Surong President JSU Mynsngad Unit uba dei ruh u Secretary shnong Mynsngad u iathuh na ka liang ka shnong jong ki ruh barabor ki juh leit ai jingtip sha ka tnat food supplier, namar ki paidbah jong katei ka shnong ki iai ujor halor ka jingduna ioh khaw hynrei kim shym la leh ei ei bad ha kane ka kynti da ka jingiatreilang bad ka seng JSU ki la mih biang ban ujor.