Da ka khusnam pynshlur ai u Bah PT ïa kiba pas Matrik ha Umrynjah

U Bah PT Sawkmie, MLA barim ha ka sngi Palei ka 30 tarik u Īaiong, 2026 u la ai da ka khusnam pynshlur ia ki 10 ngut ki samla ba pass bha ha ka Secondary School Leaving Certificate ne ka Matrik jong ka Umrynjah Presbyterian Secondary School, ha ka prokram ba la pynlong hapoh hall jong ka skul ha Umrynjah.

Ha kane ka sngi la pyniphuh iphieng ia ka prokram da ka jingrwai bad jingshad na ki khynnah skul.

Haba kren kum u kongsan u Bah Sawkmie u la pynpaw ba ka mynsiem sngew nongkyndong kam dei ban rung hapoh jong ki samla pule, ban ong ba kin ym lah ban iakhun pyrshah bad kiba na sor, hynrei ki dei ban minot thop ha ki kot pule na ka bynta ka lawei ka jong ki.

U la ong, ba ki la iohi ia ka result matrik kaba mynta u snem ba ki skul na kyndong ki ioh ia ka Top 20, kumta kim dei ban don ia ka mynsiem sheptieng hynrei ban minot thop.

U la pynpaw ruh ba u sngewkmen bha ban ioh shakri ia ki paidbah bad ba un iai bteng ban shakri na ka bynta jong ki.

U bah Sawkmie nalor ki Memento u la ai ryngkat ki envelop ia kine khynnah kiba la pass ia ka Matrik kum shi bynta ban ai mynsiem bad pynshlur ia ki.

Katba na ka liang u Reverend W. K Hujon, Pastor ba khmih ia ka Balang Presbyterian ha Umrynjah, u la pynpaw ba kane ka sngi kan ym dei tang ka jingpynkup burom, hynrei ban saindur ia ka jingim na ka bynta ka kawei jong ki.

La ioh ruh ia ka jingduwai na u secretary ka Managing Committee uba dei ruh u tymmenbasan, bah B. Thangkhiew, na tymmenbasan T. Nongrang, kyntien ai khublei na ka Kong W. Laloo, kaba dei assistant Headmistress jong ka skul bad la pyniaid ia ka prokram da u headmaster bah K. Syiemlieh.