Pyllait paidbah ia ka prokram Green Force ha thaiñ Patharkhmah

Ka ophis u Sub Divisional Officer ka Patharkhmah Civil Sub Division ha ryngkat ka jingiatreilang ka ophis u Deputy Commissioner lem bad ka Meghalaya Basin Management Agency mynta ka sngi ki la ioh ban pynlait paidbah ia programme Green Force kaban dei ka kynhun kaban trei na bynta ka khuid ka suba ha ka thaiñ Patharkhmah. Ia kane ka programme la wan ban pynlait da u Bah Sosthenes Sohtun, MLA ka Jirang bad ruh kum u Myntri ka Sorkar Jylla, ha ka jingiadonlang ruh u Chaitanya Awasthi IAS, SDO u Bah Petelman Thangkhiew Rangbah Shnong ka Patharkhmah, u Bah Bahbok Wahlang President ka Patharkhmah Youth Club & Social Welfare Organization nalor ki riew rangbah bad ki khun samla ka thaiñ.

Kumba la maitphang, ka thong jong ka Green Force Patharkhmah ka long ban don ka jingiatreilang lyngba ki Inter Village Development Championship bad ki nongshong shnong khamtam ki khun samla ha kaban pynneh pynsah ia ka jingkhuid jingsuba ka mei mariang nalor ki wah ki duid bad wat ha ki shnong ki thaw. Haba kren ha kane ka sngi, na ka liang u Bah Sosthenes Sohtun, u la pynpaw ia ka jingkmen kaba khraw bad ai jingiaroh ia ka ophis u SDO Patharkhmah Civil Sub Division lem bad ka ophis u DC, ka MBDA kiba la iohi jngai halor ka jingkongsan bad ka jingdonkam ban pynneh pynsah ia ka khuid ka suba ha ki shnong ki thaw bad ka jingpynneh ruh ia ki wah ki duid, ki sim ki doh.

U la ong ruh, ba ka long kaba donkam pat ia ka jingiasnohkti lang bad ka jingtreishitom jong ki paidbah nongshong shnong ban pynurlong ia ka thong halor ka khuid ka suba, da kaba kyntu ruh ban pynphriang ia ka khubor halor ka jinglong kongsan ban pynneh pynsah ia ka mei mariang bad ki jingdon jingem ha ka. Na ka liang ka ophis u SDO, la sam ruh ia ki tiar pynkhuid, naduh ki juti nalor kiwei kiwei ki tiar ba donkam na bynta ban trei pynkhuid ia ki Shnong ki thaw ha kaba la sdang ruh ha kane ka sngi da ka jingpynkhuid ia ka madan Western Ri Bhoi nalor ki lynti ki synkien ha Patharkhmah.