Ka jingbym ioh jaka kam dei tang ka daw ba kyrduh doctor ka Jylla

U Myntri ka tnat ka koit ka khiah u Bah Wailadmiki Shylla ula kyntait ban kren eiei halor ka jingdawa ban ai jaka ia ki doktor kiba wan na shabar ka jylla da kaba kdew ia ka Meghalaya Land Transfer Act bad ong kane ka mat ka long kaba ktah ia ki paidbah bad ia ka Jylla.

“Kane ka dei ka mat kaba khia bha, kumta nga tharai kam long ia nga ban kren eiei halor kata namar kane ka dei kaba ia dei bad ka ain die ïa thied jaka, ha kaba katei ka ain ka la don lypa” la ong u Bah Wailad.

U Bah Wailad ula ong ba kane ka mat ka iaid palat ia ki doktor. “Lada phi kren shaphang ki doktor mynta, te kan sa wan sa ki professor, bad kiwei kiwei ki jingshakri kiba kongsan hadien habud” u la ong.

Watla u Myntri u kubur ba don jingeh ban ioh doctor khamtam ki Specialist, u la kdew ba ka jingeh ban ioh jaka kam dei tang ka daw. “Khlem artatien ka long kaba jynjar namar ngi la ïohi ba ngi don ïa ki jingeh ha kaba don ïa ki specialist, wat ki professor ruh” ula ong.

“Hynrei hato dei tang kata ka daw?, kam dei kumta. Ki don kiwei pat ki daw ruh” ula bynrap.

U la ong ba ka Sorkar kan sa bishar ia kiwei pat ki bynta jong ka jingeh ban ioh doctor hynrei kan nym shim nongrim ha kaba ia dei bad ka jingai jaka.

“Khlem artatien ngin pyrshang ban peit sha kiwei pat ki liang, hynrei khamtam eh na ka bynta kane ka kam nga tharai ngam lah ban ai jingmut namar ba ka dei ka kam kaba khia bha” u la ong.