Phah ka sorkar da ki Pulit SF-10 sha Lapangap ban shngain ki paidbah

Ka Director General of Police (DGP) ka Kong Idashisha Nongrang ka la pyntip ba ka Tnad Pulit ka la phah ia ka kynhun SF-10 bad artylli pyrton ka Meghalaya Battalion sha shnong Lapangap, West Jaintia Hills bad haba bynrap ba ka Tnad ka dang pyrkhat ruh ban buh ia ka ktem Pulit ha ka thain hadien jingiakynad ka Assam ka la buh ktem pulit ha katei ka thain.

Kane ka jingpynbna ka mih hadien ka jingwan tur bad iakhih ki paid Lapangap sha Secretariat ha ka sngi Balang bad dawa ban ai bor pahara ia ki nongrep, kiba la mad ia ka jingshah jynrat ki jingthung jingtep ha ka por mynmiet ha ka kynhun kiba dei na Karbi Anglong.

Haba kren sha ki lad pathai khubor ka DGP, ka la iathuh ka jingphah bor pahara ka dei kaba la rai ha ka jingialang ba la pynlong da u Symbud Myntri Rangbah bad Tnad Pulit ka la ai ka jingkyrshan.

“Ha ka por ba mih nyngkong kane ka jingiakynad, ngi la phah ia ki pulit SF-10 ngut. Ki kwah ka jingdon ka kynhun SF-10 ha ka thain” ka la ong bad bynrap “Ki (SF-10) la hiar mynta ka sngi bad ki la dei ban poi mynta namar ki la mih dangstep” la ong ka DGP.

Halor ka jingdon briew ka DGP ka la ong, “Ka pyrton ia mynta bad ngin sa peit katkum ka jinglong jingman, ngin sa peit la ngi donkam ban phah shuh shuh ia ki briew ne em”.

Ka la pynthikna ar pyrton ki pulit Meghalaya ki la hiar haba sdang kane ka taiew. “Dang mynshisngi ruh, ngi la dep phah ia ar pyrton ki pulit ka Meghalaya sha katei ka jaka”.

Ka kong Nongrang ka la ban jur ba ka jingdonkam ban phah briew shuh shuh ka shong ha ka jinglong jingman. “Kan shong ha ka jinglong jingman. Haba ngi phah na ka bynta ban tehlakam ia ka suk ka sain, ka shong baroh na kaei kaba jia. Ka dei ka kam kaba kylla, ngi hap ban peit thuh man ka por” ka la ong.

Halor ka jingdawa ki nongshongshnong ia ka Police Outpost, ka DGP ka la ong ba ka Meghalaya kan sa shong pyrkhat ban buh ia ka len pulit, haba pynpaw ba ka Assam ka la dep leh ia kane.

“Kumba phi tip ba ka Assam ka la pynbor ba ngi dei ban bat ia ka status quo. Kumta, katba ia lade ki la buh, kaba iasyriem kum ka len. Kumta, haba peitthuh ia ka jinglong jingman, ngi ruh ngin sa khmih, ngin sa buh ia ka len” ong ka kong Nongrang.

Ka la kdew ba ka Barato Outpost kaba dang shu plie ha ka sngi Saitjain, ka don kumba 16-19 kilometer na Lapangap.

Ka DGP ka la mynjur ia ki jingpynsngew jong ki paidbah ba wan iakhih ha ka sngi Balang.

“Ki paidbah ka Lapangap ki la wan hynnin ka sngi. Kiba wan ki la bun bha. Ki Ophisar jong nga kiba don sha surok ki la pyntip ba bun na ki nongshong shnong ka Lapangap ki la iamih hynnin ka sngi” ka la ong.

“Ka dei ka jingeh kaba dei hok shisha ia ki. Ki la iai ong katba na ka liang ka Assam kam shym la khang ia ki ban leit rep hynrei kaei kaba jia, ki la leit rep ha ka por mynsngi bad ha ka por miet, kat kaba ki thung, ki la shah jynrat lut. Kane ka dei ka jingeh kaba ki la iakynduh shisha bad ki la ong ba kim shym la ioh satia ia ka jingkyrshan lem na ngi bad ngi la pyrshang hi kat kaba lah” bynrap ka kong Nongrang.