Tur ki paidbah ha Ialong Toll Plaza ba khrong pisa na ki kali ML-04 bad ML-11

Hadien ba ka Toll Plaza ba don ha Ialong, West Jaiñtia Hills District ka la sdang ban shim pisa biang na ki kali jong ki briew kiba dei napoh West bad East Jaiñtia Hills wat haba ka la sangeh shim pisa la katno katne snem da ka jingshimkhia tuklar ki sengbhalang, kumta mynta ka sngi ki paidbah ryngkat ki seng kamai kali, ki sengbhalang kum ka JNC, PSM, HYC nalor ki riew shimet ki la lum jingialang hajan kane ka Toll Plaza na ka bynta ban iakren halor ban pyrshah ia jingsdang shim pisa biang kane ka Tol Plaza.

Ha kane ka jingialang la ioh ka jingkren na u President ka JNC-West Jaiñtia Hills, u H. Bamon, na u MDC ka Saphai Sahsniang, u Rikut Pareiñ uba la ai ki kyntien Kitbok kitrwiang bad jingkyrshan ia kane ka jingpyrshah nalor kiwei pat.

Mar iakut ka jingialang ki paidbah ki la tur sha Toll Plaza ban phah sangeh ia ka jingkhrong pisa na baroh ki kali kamai, kali heh bad kali jong ki riew shimet kiba dei na West bad East Jaiñtia Hills District kumba juh leh mynshwa.

Hadien katto katne kynta ki nongniah kali kamai kim lah shah shuh bad tur sa sha ka iingtreikam ka Toll Plaza ban phah mih ia baroh ki nongtrei bad khang syndon ia kane ka Toll Plaza.

Na kane ka jingtur paidbah haka por janmiet la don ka jingiakren hapdeng u Manager ka Toll Plaza bad ki paidbah lem ki dkhot ka JNC-Western Zone, PSM, HYC bad ka seng kamai kali.

Bad na kane ka jingiakren la ioh khubor ba la mih ka rai ban sangeh noh ka jingkhrong pisa na ki kali ba don ia ki Number ML 04 bad ML 11.