Ai syrnot ka DREAM ia 15 ngut kiba la kylla jingmut bad ioh jinghikai shna jingshna

Ka Drug Reduction, Elimination and Action Mission (DREAM) hynne ka sngi ka la ai ia ki sertiphiket sha ki 15 ngut ki Shynrang kiba dei ki nongpang jong ka New Hope De-addiction Centre, Mawdiangdiang, kiba la pyndep ia ka jingioh jinghikai kaba shibnai halor ka kam ban shna jingshna da ki dieng ne ka Basic Wood Technician Furniture Course.

Ia kane ka jingai jinghikai pyntbit ka dei ba la shimkhia da ka DREAM ban tei ia ka jingioh kamai hadien ba kine ki samla ki la mih na ki jaka shah sumar bad im ia ka jingim kaba kylla bad ieh ia ki jingdih kiba sniew.

U Director ka DREAM, u Bah Francis Kharshiing ula pynapw ba kane ka jingthmu ka long ban pynkupbor ïa ki riewshimet da ki sap ban kamai kajih, ban pynsuk ïa ka jingpynïasoh biang ïa ki bad ka imlang sahlang ha ka lynti kaba don burom, ka jingdon ia ka thong bad ka jingshaniah ialade. Kadei ruh ban pynthikna ba ki sama pule kiba la pyndep ia ka jingpule ha ki College kin lah ban sdang noh mardor ia ki kam bad ka Mission kan pynbiang ia ki tiar treikam hadien ba kila mih na ka jaka ioh jingsumar.

U Bah Francis ula pyntip ba ki nongpang kiba la koit kin sa ioh ia ki tiar ki tar ban sdang ia ki kam ki jongki ban trei ia ki kam ban shna jingshna da ki dieng, khnang ba kin lah ban trei shimet ia ki kam bad ban kamai jakpoh bad ka bynrap ba kane ka sienjam ka long ban pynthikna ba kin ym donkam ban leit wad jingïarap ne jingkyrshan pisa na shabar ban ioh thied ia ki tiar ki tar, hynrei ban pynkupbor pura ia ki da ka kabu kaba iaineh bad kaba don burom ban shaniah ialade.

Kine ki jingai jinghikai kadei kaba la shimkhia da ka DREAM da kaba iatreilang bad ka Meghalaya State Skills Development Society (MSSDS) hadien ba la pyndep ia ka jingïasoi ïa ka Memorandum of Understanding (MoU) ha kaba sdang jong une u snem. Ka MSSDS kan plie lad na ka bynta ban pynlong ia ki prokram ai jinghikai pyntbit na ka bynta ki nongpang kiba dang don ha ki Rehab ha ki jaka ki bapher bapher jong ka jylla Meghalaya.

U Director ula ong ba kine ki jingai jinghikai kidei shi bynta jong ka jingai jinghikai ka baar snem ban pyntbit bad ban saindur ia ka sap ka phong bad ki nongpang kin ioh pdiang ia ki jinghikai bad ki sap pyntbit bad ia ki buit treikam da ka jingthmu ba kin kyntiew ia ka lad ban iohkam bad ba ka jingmih ka jongki na ki Rehab kan long ha ka rukom kaba bha bad kaba seisoh.