Dawa ki paitbah ban plie ia ka Hospital Maternal and Child Health ha Parila

Ka sorkar jylla ka dei ban plie noh ia ka Maternal and Child Health Hospital (MCH) ha shnong Umniangbyrnai Parila, Ri Bhoi District, khang ba ki paidbah hapoh ka District kin suk ha ka pang ka shitom bad kin lait ban leit beh sha ki hospital ha Shillong bad kiwei ki Hospital ba marjan. Kane ka hospital ka don kumba 50 jingthiah ban ai jingsumar ia kiba kha khyllung bad kiwei kiwei, hynrei haba peit ia ka jingshna ka lah ban tam 50 jingthiah ban sumar ia ki nongpang. U nongai khubor ha ka jingleit jurip dang shen la lap ba bun ki jingtei la dep lut bad ki don satang katto katne ba dang sah, kata ka mala ba ha jrong duh bad ban pynbiang ia ka umbam bad ka jingtei ia ki top um ka dang iaid shakhmat bad kyrmen shen kin sa pyndep ia ka jingtei baroh, kumjuh  ki tiar bad ki kor ki bor ba donkam na bynta ban ai jingsumar ia ki nongpang bad ki jingdonkam ha ophis.

La iathuh wat la kam pat plie hynrei la sdang ban treikam da ki katto katne ki nongtrei ban peit ia ki nongpang bad ki nongshim dawai na ka thain. Halor kane ka hospital ka don ka jingud jingnam na ki paidbah ka thain bad dawa ba ka sorkar ka dei ban plie ia katei ka hospital ba dei kyrpang ia kiba kha kyllung, hynrei la lap ba ki dang don bun ki jingduna naduh ki tiar ba donkam ha ophis bad khamtam ki kor ki bor mashin ba donkam ban ai jingsumar ia ki nongpang. Kumta, ka sorkar ka dei ban pyndep noh kloi bad ban pynbiang ia ki nongtrei bad kumjuh ki kor ki bor khang ba ki paidbah paidbah ha ka District kin suk, namar kumba long long mynta ki paidbah baroh baroh ki iabeh sha Shillong ha ka Ganesh Das hospital bad kiwei, namar bym ki hospital ban kha khyllung ha ka District bad kane ka ktah ia jinglut jingsep bad ka por ka bor baroh.

Lada ka sorkar kan pyntrei kam noh kan long ka jingkyrkhu bad myntoi ki paidbah ka ri Bhoi District bad kim donkam shuh ban ia beh sha Shillong kumba long mynta. Ha kajuh ka por, la iathuh ba shna ruh ia surok ban leit sha kane ka hospital la da ka tnad PWD  naduh snem 2024 ha ka jinglut ba palat T.80 lak tam. Kane ka hospital jngai tang kumba 2 km na suroh bah Guwahati-Shillong.