Plie u MR ia ka Solar Photovoltaic Plant ba 50 KW ha St.Mary’s

U Myntri Rangbah ka Jylla u Conrad K Sangma mynta ka sngi ula plie ia ka Solar Photovoltaic (PV) Plant ba 50 KW ha St. Mary’s Higher Secondary School Shillong, kaba la pyntrei lyngba ka Chief Minister’s Solar Mission.

Ia ka project la pyntrei da ka Meghalaya New and Renewable Energy Development Agency (MNREDA) bad ka dei kawei na ki jingpyndait ia ki kor solar kaba heh duh ha ka jaka pule ha Meghalaya bad kane ka kor ba 50KW ka shongdor kumba T.50 lak, ka don ia ki battery ban kyrshan bad la khmih lynti ba kan synniang shikatdei eh sha ka jinglah pyndap ia ka jingdonkam bording jong ka skul lyngba ka bording kaba khuid bad ka bym lut shuh.

Haba kren ha ka jingialang, u Myntri Rangbah u Conrad K Sangma ula pynpaw ia ka jingkongsan ka bording ka bym lut shuh haba pyndonkam ha ka jingiakhun ia ka jingkylla ka suinbneng bad pynthikna ia ka lawei kaba dap ba biang na ka bynta ka Meghalaya.

“Ka bording bym lut shuh kam dei shuh tang ka jingmut ka dei ka jingdonkam jong ka por” la ong u Conrad haba pynpaw ba ka jingnang jur ki jingktah jong ka jingkylla ka suin bneng ia ka mariang, ka kamai kajih bad ka jngim ba man ka sngi kala pynlong ia ka Sorkar bad ka imlang sahlang ban wad katba shem ia ki tyllong ban ioh ia ka bording kaba khuid. Ula banjur ba ki sienjam jong ka roi ka par kaba jop ka donkam kham bun shah ban ia ka jingpyndonkam tang ia ki technology.

Ula ong, ba ka CM Solar Mission ka dei kaba la pynwandur kham pher da kaba pynleit jingmut ia ki lad ki lynti ban pynbeit ia kiei kiei naduh kaba sdang haduh kaba kut ban kaba kut tang ha ka jingpyndait. Nalor ki Solar Panel, ki jaka pule kila ioh ruh ia ki Inverter bad ki Battery ban kyrshan ia ka bording ba la pynlang na ka bynta ban pyndonkam ha ka por ba duna ka sngi lane thut ka bording.

Haba batai ia ka jingheh jong ka Mission, ula pyntip ba palat 1.5 MW ka jingtan bording na ka sngi lah dep ban pyndait hajan 700 tylli ki skul ha kylleng ka Meghalaya hapoh ka CM Somar Mission, katba ka jingpyntrei sa ha ki 1300 tylli kin sa sdang noh shen bad pynpaw ruh halor ka jingiohnong na kane ka project bad ong, ba kane ka jingpyndait ia ka solar la khmih lynti ba kan iarap ia ka skul ban ioh pynlang kumba 6,000 unit ka bording man la u bnai, kaba kot ia ka jingioh pynlang pisa ba jan kot T.40,000 shibnai lane jan kot ia ka T.5 lak shisnem.

“Katto katne tylli ki Shnong, katto katne tylli ki iing, katto katne tylli ki longiing kin ioh jingmyntoi na ka bording ba pynmih na kane ka skul” ula ong haba bynrap ba lada 2000 tylli ki skul ha Meghalaya ki iashimbynta ha kane ka prokram, da ki spah tylli ki longiing kin ioh jingmyntoi na ka bording ba khuid bala pynmih da kine ki jaka pule. Ula pynbna ruh ba ka Sorkar Meghalaya kan sa pynlong shen ia ka jingiakop State-Level Technology and Iinnovation da ka jingthmu ban pynshlur ia ki khynnah skul, ki nongwanrah ia ki buit thymmai bad ki nongsengkam ba dang khynnah ba kin thaw ia ki lad ki lynti kiba treikam ban weng ia ki jingeh ha ki kam kum ka jingpynmih bording, ka jingpyniaid ia ki jaboh jabain, ka jingsam um, ka koit ka khiah bad ka rep ka riang.

Kiwei pat kiba la ai jingkren ki kynthup ia u Dr. Joram Beda, Commissioner & Secretary, Power Department, Sr. Sonia Chacko, Principal of St. Mary’s Higher Secondary School, bad kiwei kiwei.

Hadien kane ka prokram, u Myntri Rangbah ula plie ia ka 50KW Solar PV Plant da kaba ot-ribon ha ka tnum iing jong ka skulk aba pyndait ia ki solar panel. Ula iakren ruh bad ki bor pyniaid skul, ki khynnah skul bad ki Ophisar bad leit jngoh ia ki jingdon jingem ha ka skul.