Ka sorkar pdeng ka ai jingbit ban tih dewiong ha ki jaka barit: MR

U Myntri Rangbah ka Jylla u Conrad K Sangma hynne ka sngi ula ong, ka jylla ka la ioh pdiang ka jubab ba sngewtynnad na ka Sorkar Pdeng halor ka jingkyrpad ban ai jingbit ban tih dewiong ha ki par ba rit.

Haba iakren bad ki nongthoh khubor, u Conrad K Sangma ula ong, “Ngi lah ioh ia ka jubab ba biang hynrei ngan kiar pat ban ai ia kino kino ki jingtip ia mynta tad haduh ba ngin da ioh ia ka jingbit ba pura na ka sorkar pdeng”.

Kane ka jingkren u Conrad ka dei hadien ba ka la iaid ka jingkren bad ka Sorkar India ban ai lad ia ki par ba hapoh 100 hektar ban sdang biang ia ka jingtih dewiong ban plie lad ia ka jingkamai jakpoh hynrei ka dei ruh ban don ka jingshngain bad iada ia ka mariang.

“Katba ka jingtih dewiong ka dei ka bynta ka lad kamai jakpoh ba kongsan, hynrei ngi la don ruh ha kajuh ka por ban pynneh ia ka jingshngain jong ki nongtih bad ka jingshah ktah jong ka mariang” ong u Conrad bad ka bynrap “Ha ka rukom treikam, kan ym don satia kano kano ka rukom treikam kaban long long beit kaba biang pura nadong shadong, kin don beit ki jingeh bad ki jingtynjuh nangne shakhmat”.

Ula ong, ka jingtih dewiong da ka jingstad saian ne Scientific Mining kala iaid shakhmat hapoh ka jylla lyngba ka jingai bit ka Sorkar Pdeng bad lah dep ban ai jingbit ia ki 4 tylli ki par bad ka jingtreikam kala iaid shakhmat ha ki 3 tylli ki par bad lyngba ka jingtih dewiong da ka jingstad saian la ioh shalan shabar jong ka jylla.

U Myntri Rangbah ula ong, “Ka jingsngewkhia ka jong ngi kadei halor ki nongtih kiba rit, ki bym don ia ki jaka kiba kidei ban don katkum ka jingdonkam, kine ki jingtynjuh kidei kiba dang iaid shakhmat bad ngi dang pyrshang ban shimkhia ia ki da kaba pan jingbit na ka Sorkar India ha kaba ki par kiba rit kin lah ban ioh jingbit noh”.

“Katba ngi dang phaikhmat sha ka jingkamai jakpoh, ngi hap ban pynthikna ba ngi bteng ban shimkhia ia ki briew ki jong ngi, ngi donkam ruh ban shimkhia ia ka jingim bad ia ka jingshngain jong ki nongtih. Ngi dang trei bha da ka jingiajan bad baroh kynthup bad ka Sorkar India bad nga kyrmen skhem ba da ka jingiaid suki pa suki, ki kam baroh kin sa poi sha ka bynta kaba ngin lah shisha ban pyniahap tarajur ia kiei kiei baroh ha ka rukom kaba bha tam bad ka rukom kaba ryntih bha” la pynkut u Myntri Rangbah.