Mynjur ka sorkar MDA ban pynieng i’u James Sangma u kyrtong MP Rajya Sabha

Ki seng saiñ pyrthei ba donlang hapoh ka sorkar synrop Meghalaya Democratic Alliance II, hynne ka sngi ki la rai ban pynieng ia u James P.K Sangma kum u kyrtong ban iakhun ilekshon MP Rajya Sabha 2026.

Ia kane ka jingialang la pyniaid da u Chairman ka MDA u Conrad K Sangma uba long ruh u Myntri Rangbah ka Jylla bad la wan ban iashim bynta ki nongialam seng sain pyrthei kynthup ka seng NPP, UDP, HSPDP, BJP bad u Renington G Momin u MLA shimet.

Haba iakren bad ki nongpathai khubor hadien ka jingialang, u Secretary ka Parliamentary Party ka MDA II u Bah Paul Lyngdoh ula ong, ka jingïalang ka la iatai halor ka ilekshon MP Rajya Sabha bad da kawei ka jingmut ki nongialam ka MDA ki la mynjur ia ka kyrteng u James PK Sangma kum u kyrtong ka MDA ban iakhun ilekshon MP Rajya Sabha.

U Bah Paul ula iathuh ha ka jingialang baroh ki seng sain pyrthei ki la tyrwa ia la ki jong ki kyrtong, hynrei namar ka jingbym ioh ia ka jingmynjur lang kumta ki la pdiang bad mynjur ia ka jingtyrwa kyrtong na ka NPP kaba dei ka seng sain pyrthei heh paid tam bad baroh ki la mynjur ia ka kyrteng u James Sangma kum u kyrtong ka MDA ban iakhun ia ka ilekshon MP Rajya Sabha.

U Bah Paul ula pyntip ba u James Sangma un leit ban thep kyrteng ne ban File ia ka Nomination ha ka 5 tarik mynta u bnai ban iakhun ia ka ilekshon MP Rajya Sabha.

Kum ban shu pynkynmaw ka Elekshon MP Rajya Sabha kan long ha ka 18 tarik u Jylliew bad ia ka jingniew vote yn pynlong ha kane kajuh ka sngi.

Katba ia ka ilekshon MP shiteng samoi, ka jingialang ka la rai bad burom ia ka jingangnud jong ki seng saiñ pyrthei bapher ba donlang ha ka sorkar MDA, kumta la ai lad ia ki seng sain pyrthei ba kin shim hi ia ka rai ha ilekshon shiteng samoi bad da kawei ka sur ka la mynjur ba ki seng sain pyrthei ki lah ban iakhun ne kyrshan ban kiar iashim bynta ha ka ilekshon shiteng samoi.