Hadien san bnai ba jurip, sdang ka jingtei ïa ka Model Degree Kolej Mawshynrut

Hadien san bnai naduh ba la leit ban jurip ïa ka jaka, ka jingtei ïa ka Government Model Degree College ha Mawshynrut ka la sdang bad ka jingïaid shaphrang ka kam ruh ka long kaba stet bha.

Ïa kane ka projek la bei tyngka da ka Sorkar India na ka Ministry jong ka Human Resources lyngba ka Rashtriya Uchchatar Shiksha Abhiyan (RUSA) ha ka mang tyngka ba palat T.15 klur.

Ki paidbah nongshong shnong, kiba kynthup ïa ki riew rangbah bad ki longkmie, ki la pynpaw ïa ka jingsngewkmen ban ïohi ba kane ka projek kaba la ap khmih lynti slem ka la sdang ban urlong. Ki la ong ba mynshwa ki nang mut ba kan dang shimpor slem ban sdang ia ka jingtei, hynrei mynta da kaba ïohi ïa ka jingïaid shakhmat jong ka kam, ki la don ka jingkyrmen ba yn lah ban pyndep noh ïa ka college ha ka por kaba biang.

Ki paidbah ki la ong ruh ba kane ka college kan long ka jingïarap kaba khraw ïa ki samla pule jong ka Mawshynrut bad ki thaiñ ba marjan, namar kan plie lad ïa ka pule puthi khlem da donkam ban leit jngai sha kiwei pat ki jaka.

Kum ban shu pynkynmaw, ha u bnai Nohprah 2025, u Myntri ka Sorkar Jylla bad MLA ka Mawshynrut, Bah Methodios Dkhar ryngkat bad ki riew rangbah bad ki paidbah nongshong shnong, ki la leit jurip ïa ka jaka ban tei ïa ka building ba pura jong katei ka college.

Ki paidbah mynta ki don ka jingkyrmen ba katei ka shlem pule kan urlong shen bad kan wanrah ïa ka jingkiew shaphrang ha ka liang ka pule puthi ha ka thaiñ baroh kawei.