Khynra ka KSU bad FKJGP, lap 200 ki trok ba wan kamai beain ha War Jaintia

Ka Khasi Students’ Union (KSU) West Jaintia Hills District Unit, ka KSU War Jaintia Circle ha ryngkat ka jingïatreilang bad ka seng Federation of Khasi-Jaintia and Garo People (FKJGP) West Jaintia hynne ka sngi ka la pyllong ia ka jingkhynra bad ka la pynher krad ia kiba bun tylli ki trok kiba wan kamai beain ha War Jaintia.

Ha kane ka jingkhynra ki ar seng ki la lap ïa ka jingjyllei ki trok bar jylla ba kot palat ïa ka 200 tylli kiba wan kamai khlem biang ki kot ki sla naduh ki trading license bad kiwei de.

U President ka KSU West Jaintia Hills District Unit u Samla Laitphar Syngkrem u la ong ba kane ka jingioh wan kamai sahuh ki bar jylla ka long ka jingknieh ïa ka lad kamai jong ki trai ri trai muluk ka jylla.

U Samla Laitphar u la maham ruh ïa kino kino ki trai par maw ne ki nongkhaïi bad nong shalan maw sha Bangladesh ba kim dei ban ai jingïada ïa ki bar jylla kiba wan kamai khlem ki kot ki sla kiba biang bad bynrap ba lada jia eiei ïa kine ki bar jylla kito kiba wanrah ïa ki, kidei ban shim ïa ka jingbah khlieh jong ki.

Ha kajuh ka por, ula pynpaw ia ka jingsngew bynñiaw halor ka jingbym ai shuh ka sorkar ïa ka Inner Line Permit (ILP) ha kane ka jylla Meghalaya.

Ula ong ba kum ka seng kan ym man thait ban shim hi ïa ki lad jingïada ban khanglad ia ka jingwan rung khyrtlep ki mynder ha kane ka jylla.

Katba na ka liang jong u General Secretary ka FKJGP West Jaintia Hills u Samla Nangkhraw Rani, u la pynrem jur ïa ka jingbym shim khia ka JHADC ban tehlakam ïa ki trok bar jylla kiba kamai khlem ki kot ki sla katkum ka aiñ ba la pynkup bor ïa ka ha kaba ïadei bad ka jingwan khaïi pateng da ki bar jylla.

U la ong ba kane ka jingwan ki trok bar jylla ym tang ba ki la wan kamai khlem ki kot ki sla hynrei ka long ruh ka jingknieh ïa ka kamai kajih jong ki trai muluk ba im ja na ka kam ñiah trok ha kane ka thain.