Hapdeng ka jingiphuh rakhe ka St. Xavier’s Kolej ia ka Convocation banyngkong

Ka Xavier’s College, Umoid, South West Khasi Hills District mynta ka sngi ka la rakhe ia u mawjam ba kongsan ha ka jingïaid lynti jong ka ban shakri ïa ki samla da kaba pynlong ïa ka ‘Convocation’ kaba nyngkong jong ka.

Ïa kane ka jingrakhe ïa ka jingjop ha ka pule puthi kaba la sakhi lang da ki samla kiba la pyndep ïa ka jingpule, ki kmie ki kpa, ki nonghikai bad ki paitbah ka thaiñ, la wan pynshit pynshngain da u Myntri ka tnat Pule Puthi, u Bah Lahkmen Rymbui kum u kongsan ha ryngkat ka jingïadonlang u Bah F.B. Basan, Additional Deputy Commissioner, u Dr. Sunny Augustine, Principal ka St. Xavier’s College lem bad kiwei de ki riew rangbah.

Haba kren ha kane ka sngi, u Bah Rymbui u la ai mynsiem ïa ki samla pule da kaba ong, “Ha ka jingïaid lynti jong ngi, teng teng ngim lah ban pynurlong ïa ki jingangnud bad ngim lah ban poi sha ka thong, hynrei kynmaw ba kata kam dei ka jingkut namar ba ka jingim ka plie bun ki lad ki lynti ba ngin jied bad ba ngin iaid. Wat ju ngeit ia kito ki briew kiba pyni tang ia kiei kiei ki jingeh, namarba ha ka jingim lada ki long ki briew kiba pyrkhat ia ka babha, kiba kmen bad kiba thmu ban long kiba jop, yn ym don ba lah ban khanglad ia phi”.

U Myntri u la ban jur ba uwei pa uwei u briew u don la kijong ki sap ba kyrpang ba U Blei u la ai bad kumta u la kyntu ia ki samla ba kim dei ban ïanujor ïalade bad kiwei pat. U la ai jingmut ia ki samla pule ba kim dei ban duh mynsiem, hynrei ki dei ban trei shitom bad ban iaishah ha ka jingpyrshang namar ba bunsien ki lad ki lynti ki plie na ka bynta kito kiba la pynkhreh bad kloi ban trei shitom kham bun ban ia kaba mynshuwa.

U Bah Rymbui u la ban shuh shuh ba ka jingkiew jong ka Meghalaya ka shong eh ha ka jingtreilang bad ka jingiashimbynta shitrhem na baroh ki bynta jong ka imlang sahlang, khamtam ki samla. “Ngi na ka liang sorkar ngi thrang eh ban ai ïa kaba bha tam sha ki nongshong shnong khamtam ïa ki samla da kaba plie ia ki lad ki lynti na ka bynta jong ki. Ka dei ka jingïaid lynti kaba ngi lah ban ia iaid lang ryngkat ryngkat, bad lyngba ka jingiatreilang ngi lah ban wanrah ka jingkylla,” ong u Bah Rymbui haba kyntu ïa ki samla pule ban pyndonkam hok ïa ki lad jingpule ba ka sorkar ka plie na ka bynta jong ki.

Haba pdiang sngewbha ïa kane ka jingïalang, u Dr. Sunny Augustine, Principal jong ka College, u la ai khublei ïa ki Graduate jong u snem 2026 bad ai khublei ruh ïa ki kmie ki kpa, ki nonghikai bad ki paitbah na ka bynta ka jingkyrshan jong ki ban kyntiew ia ka College.