Ioh jinghikai 60 ki MSME ha jylla halor ki ‘Quality Standard’ bad BIS Certification

Ka Directorate Commerce bad Industries, Shillong ka la pynlong ka prokram ka prokram ai jinghikai ba shi sngi halor ki Quality Standard bad BIS Certification na bynta ki Micro, Small bad Medium Enterprise (MSME) ha ka 11 tarik Jylliew ha opjis Directorate Commerce Shillong.

Ha kane ka prokram la shim bynta 60 ngut ki nongseng kam, ki nongmihkhmat ki karkhana, ki heh sorkar bad ki riew shemphang ha ka teknoloji ban kyntiew ïa ka jingsngewthuh shaphang ki kyndon ba ia dei ka jingbha, ki rukom ai syrnot bad ki rukom pynïaid hapdeng ki MSME.

Ka jingthmu ka long ban pynshlur ia ki MSME ban shim ia ki Indian Standard ban sngewthuh ia ki skhim BIS Product Certification ban pyntreikam ia ki Quality Management System bad ban pynkhlain ia ka jingbud ryntih ia ki kyndon ain. Ka jingïalang ka la ai lad ban ïakren markhmat hapdeng ki MSME bad ki riew shemphang na ki jaka kiba ia dei bad ki kam jingbha ki jingdon jingem.

La sdang ia ka prokram da ka jingkren pdiang burom na ka Kong Aimeka Dkhar, Assistant Director ka Directorate of Commerce & Industries jong ka sorkar Meghalaya, kaba la ban jur ia ka jingdonkam jong ka jinglong kaba bha ha kaba kyntiew ia ka jinglah ban iakhun bad ka jinglah ban iaineh ki MSME.

Haba ai jingkren u Bah Moonlander Wanshong, Director jong ka Commerce bad Industries ka sorkar Meghalaya, ula ban jur ka bynta ba kongsan ki quality standard ban kyntiew ia ka jingmih ki karkhana, ka jingpdiang ki iew ia ki mar bad ka jingkiew ka kam. U la pynshlur ia ki nongseng kam ban pdiang ki rukom shna mar ba la pynbeit ryntih bad ki skhim ban kyntiew ia ka jingshaniah ki nongthied bad ka jinglah ban iakhun.

U Shouvik Chanda, Director ka BIS Guwahati Branch Office, ula ai ka jingbatai shaphang ka Bureau jong Indian Standards (BIS) ban kyntiew ïa ka jingbha, ka jingshngaiñ, ka jingïada ïa ki nongthied nongpet lyngba ka jingpynbeit ryntih ka jingpeit bniah ïa ka jingïahap bad ki kam pynshisha.

Haba ai jingkren halor ka jingdonkam ka jingshngain na bynta ka koit ka khiah ki paidbah, ka Dr. Wadamika Lyngdoh, Deputy Commissioner of Food Safety (Technical), ka tnad ka koit ka khiah ka sorkar Meghalaya, ka la ban jur ia ka jingdonkam ban bud ryntih ia ki kyndon bad ban iada ia ki nongthied lyngba ki rukom treikam ba la pynbeit ryntih.

Ia ka technical session halor ka BIS Product Certification Process bad ka Grant of Licence Procedure la pynlong da u Dr.ShasankaSekharBorkotoky, Consultant (Standardization Activities), BIS, bad u Jishnu Das, Standard Promotion Officer, BIS.

Ka jingialang ka kynthup ia ki rukom aplai, ki jingdonkam ba iadei bad ki kot ki sla, ka jingtest ia ki mar, ka jingpeit bniah ia ka jingbud ia ki kyndon, ka jingpeit bniah ia ki karkhana, bad ki rukom ai laisen bad pynthymmai.

Ia ka jingialang iamir jingmut halor ka Quality Management System (QMS) Certification la ai da u ShouvikChanda, uba la batai bniah shaphang ki jingmyntoi jong ka jingpdiang ïa ki kam ban pynthikna ia ka jingbha na ka bynta ban kyntiew ïa ka jingtreikam, ka jingsngewhun jong ki nongthied, bad ka jingtreikam jong ka seng.

Ki nongiashim bynta ki la ioh jingmyntoi ruh na ka jingpyni ia ka teknoloji da u Dr.HarekrishnaDeka, Head (In-Charge), CIPET Guwahati, uba la ban jur ia ki jaka test, ki jingshakri ba kyrshan ia ka teknoloji, ki rukom pynthikna ia ka jingbha, bad ki lad kyntiew ia ki sap kiba lah ban ioh da ki MSME.

Ka prokram ka la kut da ka jingialang kyllijingkylli bad jubab, ha kaba ki nongiashim bynta ki la pan jingshai halor ka BIS certification, Indian Standards, Quality Control Orders (QCOs), ISO certification, bad ki jingdonkam ban test. Ki jingiakren ki la plie lad ia ka jingiakren kaba don jingmut hapdeng ki nongshim bynta ha ka kam karkhana bad ki riewshemphang ha ka teknoloji.

Ka prokram ka kyntiew ia ka jingsngewthuh hapdeng ki MSME ha kaba iadei bad ka BIS certification, Indian Standards, bad ki rukom pynthikna ia ka jingbha. La khmih lynti ba kan pynshlur ia ka jingpdiang kham bun ia ki kyndon ba bha, ban kyntiew ia ka jingbud ryntih ia ki kyndon, bad ban pynkhlain ia ka jinglah ban iakhun jong ki MSME ha Meghalaya.