Ai khublei ka KSU ia spah ngut ki samla pule NEHU

Ka Khasi Students’ Union (KSU) NEHU Unit hynne ka sngi ka la pynlong ïa ka Khasi General Farewell Meet 2026 lane ka program ai khublei khatduh bad ai kitbok ïa ki palat spah ngut ki samla pule jong ka skulbah ha shuwa ba kin mih noh na NEHU. Iaka Khasi General Farewell Meet 2026 la pynlong halor ka phang pdeng “To ïai pyrta bad pynsawa, u Mawlynai phi don mynta, to buh ïa ka nuksa ba la ïalam, Shaphrang to ïaid jabieng to lam”La pynshong shit ïa ka jingïakynduhlang da ki jingrwai jingshad ba la ai da ki samla pule ba na ki tnat pule bapher bapher bad la sam Momento bad pynkupburom sha ki palat 600 ngut tam ki samla pule jong katei ka skullbah. Haba kren haka program u President barim ka KSU u Bah Lambokstarwell Marngar u la ong ba shibun ki khraw pyrkhat ki proh jabieng jong Jaitbynriew Khasi, hynrei duna kita kiba pynjanai ïalade ban kynjoh sha ka thong.

U la ong ïa ki samla ba haba ki la pyndep ïa ki jingpule bad mih noh na ka Skulbah, u la kyntu ba kin kynmaw ba kin don ka mynsiem noh shyniang sha ka imlang sahlang bad sha ka Jaitbynriew. U Bah Lambokstarwell u la ong, “Kam biang ïa ki samla ban ïakhun tang da ka bor met, hynrei donkam ban ïakhun ruh da ka bor jabieng bad ka jingstad.” Naka liang u MLA ka West Shillong constituency u Bah Paul Lyngdoh haba kren u la pynphalang jingmut ïa ki samla ba kin long kum ki kotkudi kiba her ha jrong bad kham sha jrong bad ba kin wanphai biang kum ka kotkudi sha tbian.

Kane ka jingkren jong u Bah Paul ïa ki samla ka thew ba ki dei ban wat ïa ki jingstad ba kham shajrong hynrei haba ki la don ka jingnang jingstad ka ba ïar ba kin ym klet ïa ka jaitbynriew bad ba kin ai ka jingshakri kum kiba la stad ïa ka ri bad ka jaidbynriew. Ha kane ka jingïalang nalor u kongsan, u synbut kongsan la don ryngkat ki nongïalam ka NEHUSU, ki nongïalam KSU barim, ki nongïalam KSU NEHU unit bad ki spah ngut ki samla pule.