Ki projek ba bei pisa na shabar ki atiar ban pynsted ia ka roi ka par ka thain shatei lammihngi: Conrad

U Myntri Rangbah ka Jylla Meghalaya, u Conrad K. Sangma ula ban jur ia ka jingiatreilang kaba kham jylliew hapdeng ki jylla ka thain shatei lammihngi bad ka jingdonkam jong ki tnat treikam kiba khlain ban pynbun ia ka jingbei tyngka na ka bynta ka roi ka par.Ia kane u Conrad ula kren ha ka sngi kut jong ka jingialang kaba ar sngi ha Shillong halor ka jingpyndonkam ia ki projek kiba wan lyngba ka Externally Aided Projects (EAPs).Haka jingialang ‘Leveraging Externally Aided Projects in the North East’ la wan ïashim bynta da ka Myntri ka tnat pla tyngka ka Sorkar Pdeng ka Nirmala Sitharaman bad ki Myntri Rangbah bad ki heh ophisar jong ki Jylla North East kaba pynpaw ïa ka jingpyrkhat kaba nang kiew ha kaba pynkhlain ïa ka jinglah jong ka thaiñ shatei lammihngi ban khring bad pyndonkam hok ïa ki jingïarap ba wan na bar.Haba kren ha ka jingïalang pynkut, u Conrad u la batai ïa kane ka jingïalang kum ka mawjam kaba kongsan na ka bynta ka thaiñ bad ula ong ba ka jingdonkam jong ka, ka paw ha ka jingïashim bynta jong ki Myntri Rangbah na kylleng ka thain shathei lammihngi.

“Kane ka jingïalang kam shym la long tang shaphang ka jingai pisa hynrei ka thmu ban pynroi ïa ki jingïatreilang, ban pynbha ïa ki bor jong ki jylla bad ban pynkhlaiñ ïa ka jingïadei hapdeng ki jylla bapher bapher bad ki tnat treikam ka Sorkar Pdeng” la ong u Conrad.U la kdew ba ki projek ba la iarap nabar lane (EAPs) ki la mih kum ka atiar kaba kongsan ban pynsted ia ka roi ka par ha ka thain shatei lammihngi.UConrad ula ong ba ki jingiakren ha kine ki ar sngi ba la dep ki la pynpaw ia ka jingdonkam ia ki jylla ban iai bteng ban thrang ban ioh jingtip ba bniah, ban pyniadei bad ban pynkhlain ia ki lad pyntreikam.Haba ai khublei ïa ki nongbei pisa bad ki heh sorkar na baroh 8 tylli ki jylla jong ka thaiñ Shatei Lammihngi, u Conrad ula ban jur ba ka jingpyntreikam ïa ka projek kaba jop kam shong tang ha ka jingai pisa hynrei ka shong ruh ha ka jingshaniah bad ka jingïatreilang hapdeng ki nongshim bynta. “Ka jingtei ïa ka jingïadei bad ka jingshaniah hapdeng ki heh ophisar bad ki tnat treikam Sorkar ka long kaba kongsan, namar kine ki jingïadei ki don ka jingktah ha ka jingshim rai,” u la ong da kaba bynrap ba ka jingïalang ka la ai ka rynsan kaba kordor ban pynkhlain ïa ka jingïatreilang na ka bynta ka thong ba ïadei lang ban kyntiew ïa ka roi ka par jong ka thaiñ.

U Myntri Rangbah ka Jylla u la kyrshan ruh ïa ka jingïatreilang kaba kham khraw hapdeng ki jylla, da kaba kyntu ïa ki jylla jong ka thaiñ Shatei Lammihngi ban ïaid lait jong ki jingthmu shimet hynrei ban ïatreilang ha ki bynta ba ki ïasam ïa ki jingmyntoi naka bynta ka thain.U Conrad ula pynpaw ïa ki bynta kum ka kam jngohkai pyrthei, ka jingïaleh pyrshah ïa ka jingkylla ka suiñbneng bad ka jingpynroi ïa ki samla kum ki bynta ha kaba ki jylla ki lah ban khlain.U la ban jur ba ki projek ba la iarap pisa nabar (EAPs) ki don ka bynta kaba kongsan ha kaba kyntiew ia ki bor jong ki jylla, ban pynbha ia ka jingpyntreikam ia ki projek bad ban kyntiew ia ka jinglah jong ki jylla ban ioh bad pyndonkam hok ia ki skhim sorkar pdeng. U Myntri Rangbah ka Jylla ula pynpaw ruh ïa ka jingsngewnguh ïa ka Myntri ka tnat Pla Tyngka ka Sorkar Pdeng Nirmala Sitharaman halor ka jingshim khia jong ka ban pynlong ïa kane ka seminar bad halor ka jingïalam lynti bad jingkyrshan kaba ka la ïai bteng na ka bynta ki jylla ka thaiñ Shatei Lammihngi.