akynduh ka CCIB ia u DIG ka BSF halor ka ker sainar shiah

Ka Coordination Committee on International Borders (CCIB) hynne ka sngi ki la iakynduh ia u DIG ka BSF u Naval Singh ban iakren haba iadei bad ka jingker sainar ha khappud ka jylla bad ka Bangladesh.

Ha kane ka jingiakynduh la synran lang da ka seng Khasi Students Union (KSU) sengkmie bad ka KSU West Jaintia Hills.

U Chairman ka CCIB u bah Kmen Myrchiang haba kren sha ki lad pathai khubor, ula ba ka jingleit iakynduh jong ki ia u DIG ka BSF ka long ban pynsngew ba kim pyrshah ia ka jingker sainar hapdeng ka Jylla bad ka Ri Bangladesh, hynrei ka jingker sainar kam dei ban ktah ia ka jaka jong ki paidbah.

U bah Myrchiang ula ong ba ki shipai BSF ki don ka jingsngewthuh bakla ba ki paidbah kim sngewtynnad lada don ki BSF. Ula pynshai ba ka jingdon ki shipai BSF ka pynsngew hun ia ka mynsiem bad ki sngew ba ki long shipara namar ka jingdon jong ki, ka wanrah ia ka jingsuk jingshngain ha kaba ki briew na ri Bangladesh kim lah ban rung beain.

Haba iadei bad ka jingker sainar, u bah Myrchiang ula ong ba ka jingkwah jong ki, ka long ba ka sorkar jylla bad ka sorkar pdeng kadei ban pynbeit shwa ia u pud u sam kumjuh ban kynjoh ktien ruh ia ki trai jaka.

“Ngi khlem pyrshah ia ka jingker sainar, hynrei ka jingker sainar kadei ban long ha Zero Line bad ka sorkar kadei ban wan ban pynbeit shwa ia u pud u sam bad kadei ban pynshai bad ia phylliew jingmut ruh bad ki paidbah nongshong jong ka thain,” ula ong.

Ula ong ba ha ka jingiakynduh jong ki ia u DIG la iakren kyrpang ruh ia u mawpud 12/72 haduh 12/78 u ba don ha ka jaka ha wah Umngot.

U la ong ba katkum ka soskular hapdeng ka ri india bad Bangladesh ba naduh u snem 1958 , ka kdew ba u mawpud u dei ban long hapdeng ka Wah Umngot, ha kaba kine ki artylli ki ri ki ioh ban pyndonkam. Hynrei mynta ka long kaba sngewsih namar ba u mawpud ula kiew shaneng bad ka wah Umngot baroh kawei ka la hap ha ka Ri Bangladesh. Kane ka long kaba sngewsih ia ki trai jaka bad ki nongshong shnong ka ri ba kane ka wah ka hap sha ri Bangladesh.

“Kumno ka sorkar jylla bad ka sorkar pdeng kam leh eiei ia kane bad lada ka pynkiew kumne ia u mawpud balei kam pyntip iangi shi kyntien kum ki trai jaka,” ong u bah Myrchiang.

Na ka liang u DIG ula mynjur ban ialeh ban iakren bad ka sorkar ban pynbeit ia kane.

Na ka liang ka CCIB ka la kyntu ia ka sorkar jylla bad ka sorkar pdeng ba kadei ban pynbeit ia ki jaka namar ba ki don bun ki jaka kiba don shabar jong u mawpud.