Ki paidbah ki la rai lypa ban kyrshan ia nga, shwa ba ngan ban leit sha ki shnong jong ki: Dr. DRL Nonglait

Ha ka jingialang ialap By Election ka NPP ban pan jingkyrshan na ka bynta u kyrtong jong ka NPP u Dr. DRL Nonglait ha ka janmiet 25 tarik mynta u bnai ha shnong Nongtalang, ba hap hapoh ka Amlarem Constituency, u Dr. Nonglait kum u kyrtong u pynpaw ka jingkhublei bad sngewnguh ia ki paidbah namar kat shaba u leit u iohi ia ka jingbun ki paidbah ba wan ban ai jingkyrshan ia u.
“Ha shwa ba ngan leit sha ki Constituency bad ki shnong ki thaw, nga lyngngoh ban shem ba ki paidbah ki la rai lypa ban ai ka jingkyrshan ia u Dr. Nonglait, halor kane nga pynpaw ka jingsngewnguh ha khmat ki paidbah” ong u Dr.DRL Nonglait.
Ula bynrad “Kumba nga la ong ha kiwei ki jaka hangne ruh ka jingbun jongphi kiba wan ka sakhi iaka jingshisha”.
Haba khot wer iaki paidbah ban ai jingkyrshan u ong ba donkam ban iasnohkti lang naka bynta ban wanrah ka shynshar khadar ba skhem naka bynta ka jingbit jingbiang ka imlang sahlang bad ki longïing longsem.
Bad ka jingkloi kohnguh jong u ban iakhun ia kane ka election naka party NPP dei namar ki kam ba ka trei, da kaba ong dei kane ka sorkar kaba wanrah iaka resolution ban kyrpad iaka sorkar kmie ban pynrung iaka ktien Khasi hapoh ka khyrnit ba 8 ka riti shynshar ka Ri bad ruh ban pyntreikam iaka ILP.
Na ka bynta kine ki artylli ki mat u ong ka sorkar Jylla kam lah ban leh ei ei, kumta kum u kyrtong lada u jop un buddien ia kine, bad haba buddien ia kine donkam ruh da u MP uba don naka liang shynshar khnang ban suk ka jingiaid lynti.
Da kaba u ai nuksa ruh ba kano kano ka bill ba wanrah daka liang shynshar ruh ka kham suk ban ioh jingmynjur.
Na ka liang u symbud myntri sorkar bah Sñiawbhalang Dhar haba pan jingkyrshan naka bynta u Dr. Nonglait ula pynsngew ruh iaki kam ka sorkar Jylla kum ka One-Time Settlement na ka bynta ki nongñiah bad trai kali kamai ha kaba kala ia jingiarap ba kin siew dep ia ki khajna bad kane ka jingleh ka sorkar dei namar ba ka don jingsngewkhia iaka kam kamai kajih ki paidbah, nangta ki jingiarap ba bunjait ka sorkar ia kiba kwah seng kam bad kiwei.
Halor ki kam ka sorkar u ong ki bym sngewthuh ki lah ban woh daw, hynrei kiba trei iaka kam ki sngewthuh iaka jingmyntoi, khamtam haba iadei bad ka kam jngohkai ki paidbah kane ka thaiñ ki sngewthuh kham bha iaki lad jingiarap ba ka sorkar ka wanrah.
Shuh shuh u ong ka jingkiew ka kam jngohkai ka rah iaka nam ka burom jongka Jylla Meghalaya sha kiwei pat ki Jylla ka Ri.
U la pynsngew ruh ba naka bynta ban pynsuk shuh shuh ki lynti syngkieng haba iadei ki kam jngohkai shaka thaiñ Amlarem ka sorkar kala mang ban dang wad ki lad ki lynti ha ryngkat ka jingtreilang ki paidbah.
Ha kane ka sngi la ioh ruh ka jingkren na u Dr.Hendey Lamin bad kiba rung thymmai shaka party NPP napoh ka Raid Buaim bad na ka liang ka 7 Amlarem Block kala pdiang burom ruh ia katto katne ngut ki nongialam ba hakhmat kiwei pat ki party kiba la wan pyniasoh shaka party NPP.