Kmen ka NEHUSU bad KSU NEHU ba mih noh u Prof. Shukla

Ka North Eastern Hill University Students’ Union bad ka KSU NEHU Unit ka la pynpaw ka jingkmen hynne ka sngi ba u Vice Chancellor ka NEHU u Prof. PS Shukla ula mih noh na ka skulbah NEHU.

U General Secretary ka NEHUSU u samla Martin Warjri ula ai khublei ia ki Dorbar Shnong, ki kynhun samla pule bad ki kynhun bapher kiba la kyrshan ia ki jingiakhih ba pynlong naduh ba sdang haduh ba kut bad dap ka jingkmen ba u Prof. Shukla ula mih noh na skulbah bad ka long laitluid ia kito kiba la kiar ban shim jingkitkhlieh ia ki jingeh ba la mad da ka skulbah.

Ha kane kajuh ka sngi, ki nongialam ki la leit ban iakynduh ia u Acting Vice Chancellor Prof SK Barik bad ai dorkhas ban pynpaw ka jingsngewkhia ia mat ba la shu ieh kumto ha kine ki snem ba la dep bad kyrpad ban shimkhia mardor ia ki mat ba donkam bad kongsan.

U la iathuh ha ka jingiakynduh ki la iakren ia ka jinglong jingman ka skulbah, halor ka jingthung kam ha ka kyrdan u Registrar In-charge bad Finance Officer In-charge ha ka por u Prof Shukla, namar ba um shym la iaid katkum ki kyndon treikam ka NEHU bad na ka liang Acting VC ula kular ban khmih bniah ia kane ka mat bad ban rah ha ka jingialang ka Executive Council.

Ka NEHUSU ka la ban jur ban pynkhie im ia ka Convocation ka skulbah ia kaba ym shym la pynlong mynta la 3 snem bad halor kane u Prof Barik ula ong, ba un shimkhia ban pynlong ia ka Convocation hapoh u bnai Nohprah, 2026.

Ka la pynsngew ruh ka jingduna ki nonghikai bad ki nongtrei kaba la wanrah jingeh bad shah ktah jur ka rukom treikam ka skulbah bad halor kane u Prof Barik ula ong ba un shimkhia ban peit ki jingdonkam nonghikai bad nongtrei hapoh ka skulbah.

Ki la kyntu ban pdiang ia ka admission katkum ka por ba la buh namar ha ki snem ba la dep ka slem ban pdiang ia ki samla pule bad pynpaw kawei ka jingeh ka long ba thylli ki kyrdan ba heh, kumta ki dawa mardor ban pyndap ia kam ba lait khnang ba ka skulbah kan lah ban treikam katkum ka jingiaid ka por.