Ha Delhi, Kerala ki ioh T.10 hajar, dawa pynkiew bainong ki nongshet ja sngi ha Jylla

Ki nongshet ja sngi ha skul hapoh ka kynhun jong ka Cook Cum-helper under PM POSHAN (Mid-Day Meal), ki la pynpaw ka jingsngewkhia bad ki la ud ba ka jingsiew T.900 ba ki ioh na ka sorkar pdeng kam iahap shuh bad ka rukom trei jong ki.Ki nongshet ja sngi, ki la iathuh ba ka jingtrei jong ki, kam duna ia ka 6-7 kynta man ka sngi ha kaba ki hap ban pynbiang ia ka bam ka dih, ka shet ka tiew, ka sait ka khlieng, hynrei ka jingsiew na ka sorkar pdeng T.900 ka la long kumba nion bein ia ki.Ha ka jingiakren bad ka kong Gina Nengnong kaba dei ka nongshet ja sngi ha ka skul Nongkwar Presbyterian Secondary School bad ka President ka President ka kynhun, ka la iathuh ba ha kiwei ki jylla kum ha Kerela bad ha Delhi, ki nongshet ja sngi ki ioh T.10000-T.8000 ka jingsiew.

Ka ong Gina ka la ong ba ka jingdawa jong ki ban kyntiew ia ka jingsiew na ka T.900 sha ka T.9000 ka long ba ki la pynshong nongrim ia ka por ba ki la pyllut ha skul na bynta ban pynbit pynbiang ia ka bam jong ki khynnah skul kiba hapoh ka kyrdan Lower Primary bad Upper Primary School.“ Ka por ba ngi trei kam sngew iahap ba ngin pan ia ka T.2000 ne T.3000 bad ngi hap ban pan katkum ka bhah ha kaba ka jylla ka la pynkiew bad kaba sah ka bhah ban pynkiew ka long sa tang na ka sorkar pdeng,” ka la ong.Katkum ka jingiathuh ka kong Gina, ha Nongkwar Presbyterian Secondary School ki don haduh 286 ngut ki khynnah kiba dei ban ioh ia ka bhah bam ja sngi ha skul bad kane ka la shimpor ia ki bad ki hap ruh ban trei da miet ban pynkhreh lypa ia ki bam ban shet mynstep.Na ka liang ka kong Gina ka la kyntu ia u Myntri Rangbahduh ka Ri ban un sngap ia ka jingdawa jong ki nongshet ja skul ha ka Ri khnang ba kin lah ban ai ka jingshakri kaba bha ia ki khynnah ha ki skul.Ha kajuh ka por, na ka liang u Vice Principal ka skul Nongkwar u babu KB Rapsang, ula pynpaw ba ka jingdon kane ka Mid Meal ka la iarap shibun ia ki khynnah kiba wan na ka longiing baduk bad ka la iarap ruh ban pyllait ia ki khynnah na ka jingpep skul shiteng por.

Haba kren halor ka jingdawa ki nongshet ja sngi ban pynkiew ia ka jingsiew , u Babu Rapsang ula pynpaw ba u sngew iahap ia kane ka jingdawa namar ka jingsiew ka la long kaba duna shaba palat ha kaba tang ha kane ka skul ka jingdon ki khynnah ka la poi sha ka 200 tam.“Na bynta ban pynbiang bam ia ki khynnah, ki nongshet ja sngi kila hap ban aiti ia ka por na bynta ki khynnah ha kaba mynstep ki la hap ban wan pynbiang ia ki jhur ki jhep bad mynstep ki la hap ban wan pynbiang ia ka shet ka tiew ban song ia ka ja. Kane ka la shim ka por jong ki,” ula ong.Ula kyntu ia ka sorkar ba kadei ban sngap iaka jingdawa jong ki.