Pynshlur ki Nongïalam ia ki samla pule ka NIFT ban saindur ia ki kam ryngkat ki bor teknoloji

Ka National Institute of Fashion Technology (NIFT), Shillong mynta ka sngi ka la sdang ia ka Orientation Programme ba lai sngi ban pdiang sngewbha ia ka kynhun thymmai ki samla pule na kylleng ka ri ban sdang ka jingpule jong ki na bynta ban sain dur bad pyniaid ia ki kam ryngkat ki bor teknoloji ka juk mynta.

Ka jingialang ka long ka jingsdang ia ka bynta bathymmai na bynta ki samla pule kiba mihkhmat ïa ki kolshor, ki ktien bad ki thaiñ bapher bapher ka India. Ia ka Orientation Prokram la sain dur khnang ban pynshai ia ki samla pule ba dang rung thymmai shaphang ki rukom ai jinghikai ha ka NIFT, ka rukom ai jinghikai kumno ban sain dur, ki nongrim jong ka jaka pule bad ki lad ba ki lah ban ioh katba ki pynkhreh ban trei ha ka kam saindur.

Ia kane ka jingialang la plie da u Anil Kariwala, Nongseng & CEO, Kariwala Industries Ltd., kum u Kongsan, bad u Dr Ravi Shankar Bhakat, Nonghikai ka Marketing, Indian Institute of Management (IIM) Shillong, kum u Symbud Kongsan.

Haba jingkren ha ka jingialang, u Anil Kariwala pynshlur ïa ki samla pule ban ym sahkut tang ha ka kamra pule bad ban pynkhreh ïa lade na bynta ki jingdonkam kiba kylla ha ka kam saindur ia ki jain bad ka kam ba ia dei bad ki jain ha pyrthei. Da kaba shim nuksa na ka jingshemphang jong u ban ialam ia ka kam ha bun bynta ha ka jingpynmih mar ryngkat ka jingkit khlieh, ka jingiaineh bad peit bniah ia ka jingbha, ula ban jur ba donkam ban pyniasoh ia ka kam saindur bad ka jingtbit ha ka teknoloji, ka jingseisoh, ka jinglong ryntih ha ka kam bad ka rukom treikam kaba khlain.

Ula kyntu ïa ki samla pule ba kin long kiba thrang ia ka jingnang jingstad ban pdiang ïa ki kor ki teknoloji ba dang mih ban sngewthuh ïa ki jingkylla ka ïew ka hat bad ban ïai bteng ban kyntiew ïa ki sap jong ki khnang ba kin nangkiew shaphrang ha ka kam wat hapdeng bun ki jingeh.

U Kariwala ula pynshlur ïa ki samla pule ba kin long kiba sngewthuh ia lade katba ki dang ïai bteng ka jingtbit ha ki kam ba ki jied. Da kaba ban jur ïa ka jingdonkam ban saindur thymmai, ka jingiaineh bad ka jingïatreilang. ula kyntu ïa ki ban iar ka jingmut jingpyrkhat bad iai neh ha ka pateng kolshor ba riewspah jong ka India. U la ban jur ka kam saindur ka sdang da ka jingsngewthuh kaba jylliew ia ki briew, ka jingthmu bad ka jingkitkhlieh.

U Dr Ravi Shankar Bhakat ula kyntu ia ki samla pule ba kin ithuh ka lawei jong ka kam saindur kam sahkut tang ha ka jingitynnad. Ula ban jur ia ka bynta ba nangkiew jong ki nongpynwan dur kum ki nongsaindur thymmai, ki nongpynbeit ia ki jingeh, ki nongseng kam seng jam bad ki nongialam ban wanrah jingkylla ha ki kam bad pynwan dur ia ka jinglong jong ki nongthied bad ban noh synniang ha ka roi ka par ba iaineh.

Haba pdiang sngewbha ïa ki samla pule, u Dr Brijesh Deore, Director ka NIFT Shillong, ula ai khublei ïa ka kynhun ba rung thymmai ha katei ka jaka pule. U la pynshlur ia ki samla pule ban don ka jinglong ryntih ha ka jingpule ban long ka lad ba khlain ban wanrah ia ka jingsaindur, ka jingpynneh ia ka kolshor bad ka jingkylla ba bha ha ka imlang sahlang. Ula kyntu ïa ki samla pule ban pyndonkam ïa ki lad jinghikai ka institute, ki jingïatreilang bad ki karkhana bad ka rukom ai jinghikai ban pynkylla kiba la tbit ha ka kam.

Ha ka sngi sdang ka Orientation Programme la batai ruh ïa ki samla pule shaphang ka rukom ai jinghikai ha ka NIFT Shillong, ki jingkyrshan ïa ki samla pule, ki jingdon jingem ha ka campus bad ki nongrim ka jaka pule.