Phah ka sorkar Jylla ban thied jaka hapoh150 yard ha khappud India-Bangla ban ym duh ki trai shnong ia ki jaka

U Symbud Myntri Rangbah ba peit ia ka tnat kam pohiing (Police) u Bah Prestone Tynsong ula pyntip ka sorkar Jylla ka la tyrwa sha ka Sorkar Pdeng ba kan shu thied ki jaka hapoh ka 150 yard ha khappud jong ka India-Bangladesh.

Kane ka jingtyrwa sha ka Sorkar Pdeng ka dei ban pyniaid sted ban ioh pyndep ia ka jingker sainar shiah bad ban ai jingiada ia ki nongshong shnong ha khappud Meghalaya-Bangladesh.

Haba kren sha ki lad pathai khubor, u Bah Prestone ula kdew ki shnong ha ki jaka khappud kum ha thain Pynursla ba don tang 50-60 meter na u mawpud.

“Lada ngi bud beit ia ka kyndon 150 yard, bun ki shnong kin hap shabar ka jingker sainar shiah. Kane kan pynlong ban kin hap hapoh ki jaka iaknieh bad kin kynduh ia ki jaka puta jong ki” la ong u Bah Prestone.

“Ngim pyrshah ia ka jingker sainar shiah namar ngi donkam ban iada ha khappud. Hynrei ngim lah ban shu ieh ia ki briew ba kin ym ioh ia kino kino ki jingiada” ula ong.

U Bah Prestone ula iathuh ba ka Sorkar Jylla ka la thoh sha ka Ministry Home Affairs bad pynlong ia ka jingiakren bad ki shipai BSF lem bad ka NBCC ban pyllait ia ki shnong na ka jingshah ker sainar ha khappud India-Bangladesh.

“Lada ym lah ban pynjynsur ia ka 150 yard, ka Sorkar India ka dei ban shu thied ia ki jaka khnang ba yn lah ban pynkynriah ia ki nongshong shnong bad ki nongrep sha ki jaka ba shngain” u la bynrap.