Pynlong ka Synjuk ki Rangbah Kur ka Bri u Hynniewtrep da ka Movement ban khanglad tuh jait ki bar jylla bad ai jaid kpa

Ka Synjuk ki Rangbah Kur ka Bri u Hynniewtrep ka la rai ban pyllong da ka Tipkur Tipkha Movement ha kylleng ki District jong ka jylla ban khanglad ia ka jingtuh jait ki bar jylla bad ban khanglad ia ka jingshim jait kpa.
Ia kane ka jingialang la sdang hynne ka sngi ha Iing Dorbar, Smit ha kaba la wan ban iashim bynta da ki riew rangbah Kur, ki Professor, ki riewshemphang, ki riewstad ain nalor kiwei de.
U President ka Synjuk u bah RL. Kharpran haba kren sha ki lad pathai Khubor ula ong ba ka daw bah ba ki pyllong ia kane ka Movement ka long namar ba la hiar dor shi katdei eh ka akor burom ha ki liang baroh jong ki kur ki jait kiba don ha ka bri u Hynniewtrep bad ka la jur ka jingtuh jait ki briew ki bym dei ki khasi.
“Ngim banse ban kyrsiew thiah ia ki seng kur ki Rangbah Kur ban pyllong da ka tipkha tipkur Movement, khnang ba kin shimkhia ban phikir bha ha kane ka bynta. Ka Lawei ki khun ki kti kan long kaba kah dum, lada ngi kiba mynta ngim lah ban leh eiei ia kane ka bynta,” ong u bah Kharpran.
Ia kane ka jingialang la sdang na ka shnong Smit kaba hap ha Hima Khyrim, kaba dei kaba dang bha ia ka niam ka rukom, ka riti dustur bad kaba dang don ia ka jingshad tynrai kaba tip ka Shad Nongkrem.
U bah Kharpran ula ong ba ynda ladep pyllong ia kane ka jingialang ha man ki District, ka Synjuk kan sa pyllong ia kawei ka Dorbar bah bad ha katei ka jingialang kin sa shim ia ka rai Rangbah.
Haba iadei bad ka jingshim jait da kaba shu leh Affidavit, u bah Kharpran ula ong ba ka Synjuk kan mih shakhmat ban tuklar ban leit kynduh ia Deputy Commissioner bad u Myntri ka tnad District Council (DCA) khnang ba kane kan ym ber bih ia ka jaidbynriew da kaba ju shu tuh jait.
Shuh shuh haba iadei bad ka jingshim jait u Shynrang ia ki khun sha lade, u bah Kharpran ula ong ba uno uno u khasi uba shong kha para khasi, hynrei u shim jait noh sha lade, un duh noh ia ka kyrdan Schedule Tribe bad yn shah pynhap ha ka General Category.
Ula pynshai ba ki briew kiba hap ha ka Sixth Schedule bad Schedule Tribe, kidei tang kiba shim jait na ka Kmie. Ha ka Dustur Khasi, ym lah ban shim lang ia ka jait kpa bad jait kmie namar kane ka lah ban buh jingma ia ki kur ki jait ka jaidbynriew bad kan buh jingma ia ka longdien mandien, ong u bah Kharpran.
“ Ha ka Dustur Khasi, dei ban shim jait beit tang na ka kmie kaba pun kaba kha, kaba pynrangbah bad kaba pynai buin ai thiang,” ula ong.
Ula iathuh ba haduh mynta ki don kumba 6000 duna ki kur ki jait ha ri Khasi Jaintia.