Lah ban ktah ka jingdon um bad ka rep ba duna ka jinghap slap ha Meghalaya

Ka Meghalaya kaba dei ka jylla ba la bna nam ha pyrthei kum ka jylla ba jur slap, hynrei mynta ka kynti ka jingioh slap ka duna bha bad ha u Bnai Jylliew bad Naitung ka jingduna ha ka rukom ioh slap ka la long 58 percent.  Katkum ki jingtip ba la pyllait da ka India Meteorological Department (IMD) ka iathuh ba ka Meghalaya ka la ioh rekod ha ka jingduna slap kaba long 58% naduh ka 1 tarik u Jylliew haduh ka 31 tarik u Naitung mynta u snem. Ka la iathuh ka jingioh slap mynta u snem ka long 681.5 mm bad ka duna shibun na kaba juh ioh baroh shi katta kaba long 1,626.2 mm bad kane ka la buh ia ka Meghalaya ha ka kyrdan ka jingioh duna u slap kaba la long haduh 83 percent bad la shim ka dei ka jingduna slap ba heh tam.

Ka jingduna slap ka la jia ha kylleng jong ka jylla, ha kaba 10 tylli na ki 11 tylli ki district ka Meghalaya, ha kaba ka West Jaintia Hills ka la mad ia ka jingduna slap haduh 78%, ka West Khasi Hills 71%, ka West Garo Hills 69%, ka East Jaintia Hills haduh 67%, ka North Garo Hills 64%, ka East Garo Hills 59%, ka South West Garo Hills 54%, ka East Khasi Hills bad South Garo Hills ka long mar 50% bad ka Ri Bhoi ka jingduna slap ka long 46%.Ka South West Khasi Hills ka la ioh slap haduh 1,917.8 mm kaba long palat ban ia kaba ju ioh kaba long 1,049.5 mm bad kane ka la lam sha ka jingpahuh ba 83% bad kane ka la don ha ka kyrdan kum ka district ba jur slap.

Kiba bun ki jaka ka jylla ki la sakhi ia ka jingjur u slap, hynrei ka jinglong jingman ha baroh kawei la lap ba ka jinghap slap ka duna bha ban ia kaba ju ioh baroh shi katta, kane ka pynlong ia kiba bun ban sngewkhia namar lada ka jingioh duna ia u slap kan dang iai bteng ha kine ki sngi bad ki taiew ban wan, kumta kan ktah ia ka jingdon jong ka um, ka rep ka riang, ki jaka pynlang um.Hynrei katkum ka jingiathuh ka tnad IMD ka la ban jur ka jingslap ha ka thaiñ shatei lam mihngi jong ka ri ha u Nailar bad ka jingduna slap ka lah ban hiar noh.