Pdiang ka Kur Talang ia ka jingpynkylla u “Rahul Kumar” sha u “Pyndaplang Talang”

Hadien ba kawei ka affidavit kaba la pynbna paidbah haki lad pathai khubor halor ka jingpynkylla kyrteng bad jait uwei u samla ba shong ba sah ha Mawlynrei, East Khasi Hills ka la saphriang ha ki rynsan social media bad wanrah ruh ka jingpynlyngngoh ia kiba bun kiba iohi ia kane da kaba buh dak jingkylli ruh iaki nongialam ka kur Talang namar ba naka kyrteng “Rahul Kumar” ula pynkylla sha u “Pyndaplang Talang”.
Kumta naka liang ka Kur Talang Central Body hapoh ka jingialam u President bah Borsing Talang, u Secretary bah Sowanki Talang lem bad kiwei ki dkhot hadien ka jingwad bniah jongki iaka tynrai jong u kumjuh kiba haiing hasem, haka sngi saitjaiñ 01/08/2026 kila shong iaka jingialang ba kyrkieh ban bishar iaki kot ki sla une u samla ha ryngkat ka jingdonlang ka kmie bad kiba haiing hasem jong u.
Halor kane ka Kur Talang kala pynshai ba une u samla u dei naka jait Kur Talang hi bad ka kyrteng ba shisha jong u ruh dei Pyndaplang katkum ka birth certificate ba ula ioh na Shillong Municipal Board namar ia u la kha ha Nasaret Hospital Shillong, ka baptist certificate jong u naka balang catholic, kumjuh ki kot ki sla naka shnong Mawlynrei. Hynrei dei tang namar ba don jingbakla ha u Aadhar jong u daka kyrteng “Rahul Kumar”.
Ka Kur Talang ka pynshai ruh ba ki dei shnong trai na Mukroh West Jaiñtia Hills District, bad daka jingialam ka mei ieid kila poi sah Shillong bad shong shnong ha Mawlynrei, bad ka kmie jong u ka Shimti Mary Talang kala ioh lok dkhar uba kyrteng u (L) K.Mohato uba dei ruh u kpa jong u.
Ka Kur ka bynrap ruh ba ka pdiang ia kiba dei Kur tynrai hynrei ia kiba shu kam khlem ki jingshisha kim lah ban pdiang.
Naka liang une u samla lem bad ka kmie jong u ka Shimti Mary ruh kila pynshai ba ka jingleh affidavit ka long tang ban pynkylla iaka kyrteng bad jait ba bakla ha u Aadhar shaka kyrteng bad jait tynrai Pyndaplang Talang kumba long ha baroh ki kot ki sla.
Ki iathuh ba ia utei u Aadhar la ialam pynshon da u kpa jong u hi u (L) K.Mohato haka por ba u ialam kai sha shnong ri dkhar ia u khun mynba u dangrit bad ha kata ka por u khlem pyntip ruh shaka lok ka kong Shimti Mary.